Kryeministri thotë se bursat e studentëve nuk do të zvogëlohen

Kryeministri i Republikës së Kosovës, Ramush Haradinaj, priti në takim një grup të studentëve bursistë të Universitetit të Prishtinës, të përfaqësuar nga studentët Drilon Berisha, Egzon Osmani, Donjeta Ahmeti dhe Arton Bunjaku.

Në këtë takim, ku i pranishëm ishte edhe Ministri i Arsimit, Shyqiri Bytyqi, ata shprehën shqetësimet e tyre përkitazi me zvogëlimin e bursave, për të cilat thanë se do të ndikojnë ndjeshëm në motivimin e studentëve të dalluar bursistë.

Haradinaj po ashtu e quajti të padrejtë këtë vendim të Këshillit Drejtues të Universitetit të Prishtinës “Hasan Prishtina”, derisa i garantoi studentët që do të bëjë çdo gjë që është në kompetencën e tij dhe të Qeverisë së Kosovës që t’ju ofrojë mbështetjen e duhur gjithë studentëve, duke theksuar se gjatë mandatit të tij, arsimi do të jetë prioritet për Qeverinë.

“Është i padrejtë vendimi për zvogëlimin e shumës së bursës. Ju garantoj se nuk do të ketë zvogëlim të bursave, përkundrazi bashkë me Ministrinë e Arsimit do t’i shqyrtojmë mundësitë dhe format të tjera që kjo shumë të rritet”, tha kryeministri Haradinaj.

Ai po ashtu në koordinim me Ministrin e Arsimit, kanë shprehur interesim edhe që studentët e dalluar të kenë forma sa më të mira të stimulimit nga ana e institucioneve përkatëse, duke thënë se do të rikthehet shuma e mëparshme e pagesës.

Artikulli paraprak“Çlirimtarët” që po vrasin Kosovën!
Artikulli vijuesSi i vodhi Enver Hoxha 300 ton flori nga Shqipëria?