Gjermania parajsë për larje parash

Në Gjermani kriminaliteti i organizuar po pastron gjithnjë e më shumë para të fituara në rrugë të paligjshme. Këtë e tregojnë shifrat e fundit të Entit Federal të Kriminalistikës. Luftimi mbetet megjithatë i vështirë.
Gati 13.000 kallëzime për dyshim për larje parash morën autoritetet vitin e kaluar. Në gjysmën e rasteve rezultoi se dyshimi ishte i bazuar. Ky është një maksimum rastesh qysh nga 1993-shi. Asokohe hyri në fuqi ligji kundër larjes së parave. Për shembull ai i detyron bankat që t’i raportojnë Entit Federal për Mbikqyrjen Financiare në rastet kur në llogari bankare që deri atëherë nuk kanë rënë në sy, fillojnë të lëvizin shuma të mëdha.
Sipas raportit të Entit Federal të Kriminalistikës, të publikuar të hënën (29.10.2012), kanë tërhequr vëmendjen veçanërisht pagesat nga Italia, Rusia, Ukraina dhe nga Bjellorusia. Raporti zbulon gjithashtu se krahas tregtarëve të pasurive të patundshme, pronarëve të restoranteve dhe operatorëve të lojërave të fatit, llogaritë bankare i kanë vënë në dispozicion edhe një numër në rritje personash privatë.
Rrjedha të padepërtueshme parash
Geld auf Wäscheleine Symbolbild “Fatkeqësisht, kushtet në Gjermani e favorizojnë ende pastrimin e parave”, shpjegon Gerhard Schick, i cili merret me këtë temë si deputet i Të Gjelbërve dhe si anëtar i Komisionit parlamentar për financat. “Niveli i vetëdijes në lidhje me përmasat e gjithë kësaj është tepër i ulët”, shpjegon Schick në intervistë me Deutschen Welle-n.
“Shumë firma tregtare bëhen sa vjen e më të padepërtueshme”, i duhet të pranojë edhe presidentit të Entit Federal të Kriminalistikës, Jörg Ziercke. Për këtë arsye kontrollet do të intensifikohen. Kjo është e nevojshme, mendojnë ekspertë të Organizatës për Bashkëpunimin Ekonomik dhe Zhvillimin (OECD) dhe të Komisionit Evropian në Bruksel. Të dyja institucionet e akuzojnë Gjermaninë prej kohësh se bën pak kundër pastrimit të parave.
Kritikë nga Brukseli
Detektivët gjermanë e përllogarisin me 50 deri 60 miliardë euro shumën që dërgohet në Gjermani me origjinë nga shantazhet, narkotikët apo nga tregtia e armëve. Autoritetet hetuese nuk arrijnë të sekuestrojnë as një për qind të këtyre shumave, ankohet Shoqata profesionale e policisë kriminalistike. Sipas saj, në sektorin bankar ndjekja penale mbetet të garantohet, por në shumë degë duhet të futet mbikëqyrja dhe kontrolli shtetëror. Mirëpo, me gjasa kjo nuk dëshirohet politikisht, mendon kriminalisti Sebastian Fiedler.
Për shkak të sjelljes hezituese të qeverisë gjermane Komisioni Evropian ka nisur një procedurë për shkelje të marrëveshjes- Argumenti kryesor është ky: Mungesa e ndjekjes penale të larjes së parave bën të mundur edhe financimin e pakontrolluar të terrorizmit. Sipas shifrave të Financial Action Task Force (FATF) të OECD-së, vendet e tjera hetojnë realisht më rreptë dhe ato shënojnë katërfishin deri njëzetfishin e zbulimeve të veprave penale.

Artikulli paraprakEksperienca gjermane, "çelës" punësimi për të rinjtë ballkanas
Artikulli vijuesPranvera arabe – pengesë apo nxitje për ekonominë?