Kenia, muslimanët mbrojnë të krishterët

Strategjia e tyre e frikës dhe terrorit është e njëjta: Ndërmerr një sulm, veço të krishterët, bëji shoshë me plumba. Por në pritën e fundit, të hënën, kur i zunë rrugën një autobusi të mbushur plot me njerëz, militantëve të Al-Shababit gjërat nuk i shkuan sipas planit.

Një grup myslimanësh u hodhën t’i mbronin pasagjerët e krishterë me trupat e tyre duke u kthyer në mburoja njerëzore. Sulmuesve iu thanë se ishin të përgatitur të vdisnin së bashku.

“Ose na vrisni këtu të gjithëve, ose na lini të qetë”, ishin fjalët e pasagjerëve myslimanë, pjesa më e madhe gra. Autobusi udhëtonte drejt qytetit të Manderas, pranë kufirit që vendi ndan me Somalinë dhe Etiopinë.

Aq i mbarsur me rreziqe është një rrugëtim i tillë sa pjesa më e madhe e autobusëve udhëtojnë zakonisht të shoqëruar nga eskorta policore. Këtë herë megjithatë, nuk ndodhi kështu për shkak se makina e policisë ishte prishur e autobusit i është dashur ta vazhdojë rrugën i vetëm.

Sulmi i miliantëve islamikë erdhi pas disa orësh. Al-Shababi, grupi somalez i renditur nga Shtetet e Bashkuara në listën e organizatave të huaja terroriste, kërkon kthimin e Somalisë në një Shtet Islamik fondamentalist. Por ai ka ndërmarrë një seri goditjesh në Kenia, i nxitur nga fakti që në vitin 2011, forcat ushtarake keniane u dërguan në Somali për të luftuar ekstremistët.

Qëllimi i grupit është i qartë, të mbjellë faren e përçarjes në rajonet kufitare mes dy vendeve, ku pjesa dërrmuese e banorëve janë somalezë etnikë.

Një ndër aktet më brutale të Al-Shababit ishte masakra e muajit prill në Universitetin e Garissas, ku u vranë gati 150 vetë. Dëshmitarë okularë rrëfyen atëherë sesi agresorët iu kërkuan studentëve të recitonin vargje nga Kurani. Ai që nuk dinte t’i thoshte, ekzekutohej në vend.

Artikulli paraprakArabia S.: Në zgjedhje kandiduan afër 979 gra
Artikulli vijuesParlamenti grek miraton vendimin për njohjen e Palestinës