Arrestohet shqiptari më i urryer në SHBA

Djaloshi shqiptar në Shtetet e Bashkuara të Amerikës, që u kthye në personin më të urryer për shkak se rriti çmimin e një ilaçi të rëndësishëm nga 13.5 në 750 dollarë, është arrestuar për shkelje fiskale të kryera përmes një firme të themeluar prej tij.
Lajmin për arrestimin e 32-vjeçarit Martin Shkreli, i cili në shtator u kthye në simbolin e lakmisë, bëhet i ditur nga agjencia “Bloomberg”. Megjithatë, çështja federale e hapur në ngarkim të tij nuk ka të bëjë me çmimin e ilaçit.
Prokurorët e akuzojnë atë se ka marrë ilegalisht aksione të “Retrophin Inc”, një firmë bio-teknologjike që ai e ngriti në vitin 2011, dhe i ka përdorur ato për të shlyer borxhe të bizneseve të tjera.
Shkreli është dëbuar nga kompania në fjalë, ku ishte shef ekzekutiv dhe është paditur nga bordi i saj. Prokurorët federalë e akuzojnë 32-vjeçarin se është përfshirë në një lojë ilegale pasi fondi i tij bazë i kompanisë MSMB Capital Management, humbi miliona dollarë.
Ai dyshohet se ka kryer pagesa sekrete dhe se ka realizuar një sërë skemash mashtrimi.
Djali i dy emigrantëve, shqiptar dhe kroat, që punonin si pastrues dhe që e rritën atë në lagjen e Bruklinit në Nju Jork, përbën njëkohësisht mishërimin dhe njollosjen e ëndrrës amerikane.
Në moshë edhe më të re, ai tregonte premisa të jashtëzakonshme. Pasi braktisi një shkollë të mesme elitë në Manhatan, ai nisi pushtimin e Wall Street para se të mbushte 20 vjeç.
Emri i tij pushtoi planet dhe faqet e para të mediave pasi rriti me mbi 55 herë çmimin e Daraprimit, ilaçi më i preferuar për trajtimin e “gjendjes parazite”, e njohur si toksoplazmë, që mund të jetë vdekjeprurëse për bebet ende të palindura, për pacientët me sistem imunitar të cënueshëm, për ata me HIV dhe kancer.
Kompania e tij, “Turing Pharmaceuticals AG”, e bleu ilaçin e futi atë në një sistem të ngushtë shpërndarjeje dhe rriti çmimin në stratosferë.