Lëvizja BESA ka reaguar për mos uljen e çmimeve të produkteve edhe pse çmimet e karburanteve vazhdimisht po ulen. Në reagim thuhet se sa herë që ka ngritje të çmimit të karburanteve menjëherë është reaguar, duke u rritur edhe çmimi i transportit publik, i produkteve ushqimore, por edhe çmimet e tjera, duke u arsyetuar se çmimi i lartë i naftës ndikon në mënyrë direkte edhe në rritjen e kostove.
“Prandaj Lëvizja Besa e pyet Qeverinë e R. së Maqedonisë: tani që gjendemi në një situatë kur një barell naftë kushton vetëm 30 dollarë, ne pyetemi se pse institucionet shtetërore nuk reagojnë për t’i zbritur edhe çmimet e produkteve dhe shërbimeve? Pse, së paku, nuk ka zbritje të çmimeve në transportin publik, me çka qytetarët do të përfitonin në mënyrë të drejtpërdrejtë? Në këtë drejtim, kur karburantet janë me çmim të lartë dhe menjëherë bëhet intervenim brenda natës në produktet ushqimore, duke u rritur në mënyrë drastike çmimet e tyre, pse tash kur kemi zbritje të çmimit të naftës institucionet përgjegjëse heshtin dhe e anashkalojnë këtë zbritje, duke e dëmtuar rëndë qytetarin e rëndomtë, i cili edhe ashtu gjendet në një situatë të mjerueshme ekonomike?”, theksohet në reagimin e Besës.
Lëvizja BESA poashtu ka apeluar deri te institucionet shtetërore që të marrin masa të menjëhershme adekuate dhe ta zbusin gjendjen ekonomike të qytetarëve.
