Kosova “humbë” shtetasit e saj

Sipas statistikave të Divizionit për Shtetësi të MPB-së, nga viti 2011 e deri më tani. 4 mijë e 269 persona janë liruar nga nënshtetësia e Kosovës. Në të njëjtën periudhë janë refuzuar vetëm 244. Edhe pse disa nga bashkatdhetarët tanë pohojnë se në disa shtete, në situatat kur aplikohet për marrje të shtetësisë refuzimi për lirim nga shtetësia e mëparshme nuk prishë punë, autoritetet e Kosovës nuk e aplikojnë këtë metodë. Ata kështu e zvogëlojnë në vazhdimësi numrin e banorëve.

Liridon Neziri, udhëheqës i Divizionit për Shtetësi, në Ministrin e Punëve të Brendshme, ka thënë për Kosovapress se gjatë vitit 2011 ka qenë një numër i konsiderueshëm i qytetarëve që kanë aplikuar për t’u liruar nga shtetësia e Kosovës.

“Arsyeja e lirimit është zgjedhja e këtyre personave për mbajtjen e një nënshtetësie të ndonjë vendi evropian, që nuk lejon mbajtjen e dyshtetësisë”, ka thënë Neziri.

Numri i refuzimeve, karshi aty që janë aprovuar, del të jetë shumëfish më i vogël. Ndërsa, arsyet e refuzimit ndodhin kryesisht tek aplikacionet për fëmijë, prindërit e të cilëve ende nuk janë të liruar nga nënshtetësia e Kosovës.

I pyetur se përse nuk ka më shumë refuzime, përderisa refuzimi nuk paraqet problem për aplikuesin që ta fitojë nënshtetasin e një vendi tjetër, Neziri deklaron se kjo nuk parashihet në politikat dhe kriteret e këtij departamenti.

Për të marrë një shpjegim në lidhje më procedurat të cilët kërkohen nga vendet e BE-së, posaçërisht nga shteti i Gjermanisë, Kosovapress i është drejtuar me pyetje Ambasadës gjermane në Prishtinë. Milena Wendering thotë se sipas ligjit të shtetit gjerman për nënshtetësi, personat të cilët planifikojnë të marrin nënshtetësinë gjermane, fillimisht duhet ta dorëzojnë nënshtetasin e tyre të mëhershme.

“Kjo gjë nganjëherë nuk mund te realizohet. Por, autoritet gjermane do ta shqyrtojnë çdo rast individualisht”, ka bërë të ditur Wendering.

Ndryshe nga zyrtari i Divizionit për Shtetësi, një shtetas i Gjermanisë dhe njëkohësisht i Kosovës ka rrëfyer përvojën e tij.

Vebi Kajtazi nga Gjilani ka thënë se më 2004 ka aplikuar për t’u pajisur me nënshtetësi gjermane. Për shkak se në atë kohë qytetarët e Kosovës trajtoheshin si qytetarë të Serbisë, autoritetet gjermane i kishin kërkuar pëlqimin e Serbisë për lirim nga shtetësia. Duke përdorur lidhjet e tij, ai kishte aplikuar për lirim të shtetësisë në Vranjë të Serbisë, ku ishte e zhvendosur e ashtuquajtura administratë e komunës së Gjilanit. Sipas Kajtazit, autoritetet e Vranjës e kishin refuzuar lirimin nga nënshtetësia, me arsyetimin se nuk kishte mbaruar shërbimin ushtarak!

“Ky refuzim më mërziti shumë, pasi mendoja se do të refuzohej edhe shtetësia gjermane. Pasi shkova në Gjermani, zyrtarëve të atjeshëm u tregova që më ishte refuzuar lirimi nga nënshtetësia e Serbisë. Derisa prisja edhe refuzimin e tyre, u befasova nga reagimin i qetë i zyrtares. ‘Mirë, ti e ke bërë tënden. As refuzimi nuk paraqet problem. Ne mund ta japim shtetësinë gjermane, mirëpo nuk mund të garantojmë për problemet që mund t’i kesh me shtetin serb, nëse shkon atje. Për çdo vend tjetër, jashtë Serbisë, shteti gjerman të ofron mbështetjen, si ndaj çdo qytetari tjetër të tij’”, ka thënë Kajtazi.

Nëse vazhdon me këtë ritëm aprovimi i kërkesave të bashkatdhetarëve tanë për lirim nga nënshtetësia e Kosovës, atëherë në pesë vitet e ardhshme Republika e Kosovës do të humbë mbi 21 mijë qytetarë./kohaislame/

Artikulli paraprakBE: Mund të dialogohet për veriun
Artikulli vijuesZyra në veri varet nga vullneti i strukturave ilegale