Pas kthimit të Listës Serbe në institucione janë shtuar gjasat që marrëveshja për Demrakacionin me Malin e Zi të rikthehet në Kuvend, e ku nuk përjashtohet që kjo çështje të jetë një nga pikat e rendit të ditës në seancën e së enjtes së javës së ardhshme.
Ndonëse nuk ka përafrim mes mazhorancës dhe opozitës për marrëveshjen në fjalë tashmë janë shtuar zërat sidomos nga tabori qeveritar se me kthimin e deputetëve të minoritet serb i kanë votat për kalimin e saj.
Pavarësisht deklarimeve të tilla e vërteta është se as kthimi i deputetëve në fjalë nuk siguron votat e mjaftueshme duke parë kundërshtimin e disa deputetëve të koalicionit qeverisës PDK-LDK.
E vetmja mënyrë që të kalojë Demarkacioni është që deputetët e mazhorancës të ndryshojnë qëndrim në momentin e fundit dhe t’iu binden urdhërave të “shefave” të tyre Kadri Veselit e Isa Mustafës.
E kaluara ka treguar (rasti i votimit të Thaçit për president, rasti i Ramiz Kelmendit, ndryshimi i mendimit për Demarkacionin) se për interesa të ndryshme qoftë partiake apo private deputetë të caktuar ndonëse kanë paralajmëruar votën kundër, në momentin e fundit mund të dorëzohen.
Një gjë e tillë mund të ndodh fare lehtë edhe për Demarkacionin duke parë vendosshmërinë e qeverisë për ta ratifikuar marrëveshjen në fjalë, për çka është raportuar së fundmi se deputetë të caktuar të PDK-së e LDK-së vetëm kanë ndryshuar mendim.
Deputetët e mazhorancës që kanë rikonfirmuar votën kundër Demarkacionit
Pavarësisht thirrjeve të liderëve të partive të tyre, deputetë të caktuar të PDK-së e LDK-së kanë konfirmuar votën e tyre kundër Demarkacionit.
Deputeti i PDK-së, Shaip Muja, vazhdon të mbetet i palëkundur dhe thotë në mënyrë kategorike se nuk e voton marrëveshjen aktuale të shënjimit të kufirit me Malin e Zi.
Ai ka thënë se kurdo që Demarkacioni të rikthehet në Kuvend, nuk do ta votojë, duke thënë se komisioni për verifikimin e Demarkacionit ka paraqitur raportin e komisionit të parë shtetëror.
Shpejtim Bulliqi, deputet i LDK-së, po ashtu ka paralajmëruar se nuk e voton në asnjë mënyrë marrëveshjen aktuale edhe pse është kërcënuar nga Mustafa me largim nga partia. Fatmir Rexhepi, deputet i LDK-së, po ashtu ka bërë të ditur se nuk e voton marrëveshjen.
Labinote Demi – Murtezi, deputete e Partisë së Drejtësisë që është në koalicion me PDK-në, po ashtu ka rikonfirmuar votën kundër.
Edhe Adem Salihaj deputet i LDK-së ka rikonfirmuar se vota e tij do jetë kundër. Raif Qela deputet i Lëvizjes për Bashkim parti kjo në koalicion me PDK-në po ashtu mbetet i palëkundër dhe ka paralajmëruar votën kundër.
Deputetët që hezitojnë të bëjnë publike votën
Ndonëse janë edhe disa deputetë të PDK-së e LDK-së që haptaz kanë shprehur kundërshtinë e tyre për mënyrën se si është bërë demarkimi i kufirit me Malin e Zi, ata hezitojnë të bëjnë publike votën.
Ata kërkojnë që të ketë një konsensus politik për çështjen në fjalë.
Deputeti i PDK-së, Shukri Buja, ndonëse deputeti më kritik kundër kryeministrit Mustafa dhe koalicionit qeverisës ka thënë së fundmi se “o ta respektoj deklaratën e Konventës, në rast se do të ketë konsensus politik institucional, unë do ta votoj Demarkacionin, por siç po shihet vështirë të ketë një konsensus institucional për shkak të qëndrimeve të opozitës dhe disa deputetëve të koalicionit”.
Nait Hasani deputet i PDK-së i cili në procedimin e parë në Kuvend të marrëveshjes ishte kundër, së fundmi në një deklarim për mediat nuk ka preferuar ta bëjë publike votën e tij, duke thënë se “nuk kam ndonjë përgjigje”.
Deputeti tjetër i PDK-së Adem Grabovci, po ashtu kohë më parë ka paralajmëruar se nuk do ta votojë Demarkacionin, derisa në një intervistë deklaroi se “Kosova humb shumë territor nga demarkimi i kufirit me Malin e Zi”.
Bislim Zogaj, deputet i PDK-së nuk ka preferuar të bëjë publike votën e tij, duke thënë se nëse nuk kalon Demarkacioni, vendi duhet të shkojë në zgjedhje.
Besa Gaxherri, e cila në gusht të vitit 2016 doli publikisht kundër Demarkacionit me Malin e Zi, tashmë nuk ka treguar sesi do votojë. Ajo në një deklarim për gazetën “Blic” ka thënë se “është duke pritur deri në fund se çka po ndodh me këtë proces, në mënyrë që pastaj të vendosë”.
Ndonëse është raportuar se janë kundër Demarkacionit, nuk dihet sesi do votojnë as deputetët e tjerë të LDK-së, Vjosa Osmani, Anton Quni, Arben Gashi, Armend Zemaj, Nuredin Ibishi e Hatim Baxhaku, pasi nuk kanë preferuar të flasin se si do të votojnë
Qëndrimi i deputetëve të pavarur
Ilir Deda dhe Gëzim Kelmendi janë dy deputetët e pavarur që publikisht kanë deklaruar se nuk e votojnë Demarkacionin.
Votë kundër ka paralajmëruar edhe deputetja e pavarur, Margarita Kadriu-Ukelli, në gusht të 2016-tës dhe nuk ka më një deklarim të ri nga ana e saj për këtë çështje.
Kujtojmë se për ratifikimin e Demarkacionit duhen së paku 80 vota, ose 2/3 e deputetëve të Kuvendit.
