Së paku 10 mijë njerëz sot në kryeqytetin Kishinev kanë protestuar kundër qeverisë së Moldavisë, duke kërkuar dorëheqjen e saj.
Kjo ishte dita e katërt e protestave të njëpasnjëshme në sheshin kryesor të kryeqytetit.
Disa protestues janë përleshur me policinë derisa janë përpjekur të depërtojnë në ndërtesën e parlamentit.
Protestat masive në Moldavi filluan më 6 shtator, kur dhjetëra mijëra njerëz dolën në rrugët e Kishinevit, për të protestuar për shkak të dështimit të qeverisë aktuale properëndimore për ta luftuar korrupsionin dhe për zbatimin e reformave të vërteta.
Protestuesit, po ashtu, kërkojnë hetime lidhur me zhdukjen e gati 1.5 miliardi dollarësh nga tri banka të Moldavisë, vitin e kaluar, dhe ata që janë përgjegjës të ndiqen penalisht.
