Në Ballë për Ballë të emisionit Ora e Fundit në Klan Kosova, i ftuar ishte Sekretari i Përgjithshëm i Partisë së Drejtësisë, Fidan Mustafa.
Mustafa ka treguar për vendimet që janë marrë në mbledhjen e anëtarëve të këtij subjekti politik rreth pakënaqësive që kanë më kryetarin, Ferid Aganin.
“Pak më parë patëm një takim me kryetarët e degëve, ku morën pjesë rreth 15 kryetarë të degëve, biseduam rreth zhvillimeve të fundit në parti”.
“Ne diskutuam rreth këtyre zhvillimeve dhe arritëm konsensusin që të mbledhim Kuvendin e partisë, do të shkojmë në Kuvend të jashtëzakonshëm zgjedhor”.
Ai ka treguar se pse kanë ndodhur këto përçarje brenda Partisë së Drejtësisë.
“Kjo është kërkesa e 18 kryetarëve të degëve, pas një mori shkeljesh me theks të veçantë shkeljen e vendimit të Kuvendit të Punës ku është diskutuar mbi Demakracionin”.
“Në kuadër të këtij Kuvendi është diskutuar se versioni i këtij Demarkacioni nuk duhet të kalojë derisa kryetari Agani ka zgjedhur një qëndrim të ri”.
Mustafa ka thënë se edhe deputetja Labinotë Demi –Murtezi është pjesë e anëtarëve të partisë që dëshirojnë ndryshime.
Sekretari i Përgjithshëm ka mohuar faktin se kjo iniciativë ka ardhur si pasojë e aktakuzës që është ngritur kohë më parë ndaj kryetarit Agani.
“Ne dëgjuam Aganin që pretendon se kjo ngritje për iniciativë të ndryshimeve brenda ka ardhur si rezultat i ngritjes së aktakuzës por kjo nuk qëndron”.
“Kjo është një çështje që i takon organeve të drejtësisë, ne si parti e drejtësisë e kemi mbështetur Aganin në këtë proces dhe besojmë në pafajësinë e tij”.
Ai ka insistuar se pjesa dërmuese e partisë dëshiron ndryshime brenda partisë derisa ka potencuar se së shpejti do të publikohet data e Kuvendit Zgjedhor.
“Mendoj që brenda javës do të dalim me një datë konkrete për Kuvendin, gara do të jetë e hapur, të drejtë kandidature kanë të gjithë”.
Në fund, ai ka përmendur edhe koalicionin me PDK duke shtuar se i njëjti do të rishikohet dhe diskutohet me anëtarët.
“Do të diskutohet, do t’i diskutojmë të gjitha, që nga arritja e marrëveshjes me PDK-në është realizuar 1/3 dhe për këtë askush nuk ka dhënë llogari”.
