Pritjet amerikane

E pyetur rreth pritjeve në luftën kundër korrupsionit, Ambasada e Shteteve të Bashkuara të Amerikës ka thënë se në vazhdimësi ka folur publikisht për domosdoshmërinë e luftimit të korrupsionit dhe ka shumë shembuj nga fjalimet e ambasadorit Greg Delawie rreth kësaj çështjeje gjatë një viti të kaluar, shkruan sot Koha Ditore.
“Një fillim i mirë do të ishte që Kosova të sigurohet se askush që është me aktakuzë nuk lejohet të vazhdojë të shërbejë në post publik”, ka thënë për “Kohën Ditore” J. Michelle Schohn, zyrtare për marrëdhënie me publikun e Ambasadës së SHBA-së në Prishtinë. “Ky vazhdon të mbetet një problem në Kosovë”, ka shtuar ajo.
Në mesin e masave tjera që do të mund të ndërmerreshin nga institucionet e vendit, ajo thotë se “emërimi i zyrtarëve të lartë dhe anëtarëve të bordeve bazuar në meritat, dhe jo lidhjet politike, do të ishte një lëvizje tjetër e mirë”, ndërsa përshëndet iniciativën e Ambasadës britanike për parandalimin e emërimeve politike në poste të tilla.
“Kosova, po ashtu, ka nevojë të trajtojë çështjen e atyre që marrin benefite qeveritare, të cilat nuk i kanë merituar”, tha Schohn.