Ekzekutohet Shefi i Shtabit të ushtrisë koreane

Me urdhër të udhëheqësit koreano-verior Kim Jong Un, është ekzekutuar një prej figurave kryesore në ketë vend. Bëhet fjalë për Shefin e Shtabit të ushtrisë, gjeneralin Ri Yong Gil, viktima e radhës e një serie spastrimesh mes zyrtarëve të nivelit të lartë.
Lajmin e bëri të ditur Agjencia Koreano-Jugore e lajmeve “Yonhap”, sipas të cilës gjenerali është ekzekutuar këtë muaj me akuzën e korrupsionit.
Shërbimet sekrete të Koresë së Jugut nuk e kanë komentuar lajmin, ndërsa Koreja e Veriut rrallë njofton publikisht ekzekutime të tilla.
Në vitin 2013 u ekzekutua po për korrupsion xhaxhai i Kim Jong Un, që konsiderohej figura e dytë me e rëndësishme në vend.
Lajmi i ekzekutimit të shefit të shtabit të ushtrisë vjen në një kohë kur tensionet mes Phenianit, fqinjëve të tij dhe ndërkombëtarëve janë shtuar, pas informacioneve për lëshimin e një rakete me rreze të gjatë veprimi të dielën e kaluar, e që pasoi një tjetër provë bërthamore të vendit.