Shqipëria gjithnjë e më shumë po bëhet një nga vendet më pesimiste për të jetuar, të paktën këtë e thotë dhe raporti i OKB-së sa i përket lumturisë së popujve në Evropë.
Sipas këtij raporti Shqipëria ka humbur 14 vende në listën e përgjithshme duke u rënditur në vendin e 109, ndërkohë që përgjatë viteve 2012-2014 renditej në vendin e 95-të.
Në këtë mënyrë Shqipëria rënditet në vendin e parafundit duke lënë pas vetëm Bullgarinë. Ndërkohë që Kosova renditet në vendin e 77-të.
Po të shohim renditjen rajonale, vendi më i lumtur është Rumania, që ndiqet nga Kroacia dhe Kosova që plotëson treshen e parë. Pas tyre, me radhë vijnë Serbia, Bosnje-Hercegovina, Mali i Zi, Maqedonia, Greqia dhe e parafundit është Shqipëria. Organizata e Kombeve të Bashkuar ka cilësuar Danimarkën si shtetin më të lumtur të botës, që është ndjekur nga Zvicra, e cila e mbante këtë vend një vit më parë. Treshja më e lumtur e globit plotësohet nga Islanda.
Zyrtarët e kësaj organizate kanë komunikuar se prosperiteti dhe zhvillimi i ekonomisë nuk është përbëjnë kriteret bazë në përcaktimin e renditjes. Ata kanë marrë si shembull, Shtetet e Bashkuara, të cilat pavarësisht zhvillimit, kanë një shoqëri e cila është shumë e orientuar drejt parasë.
Në matje janë shqyrtuar disa aspekte përfshirë mbështetjen sociale, pritshmëritë për një jetë të shëndetshme, liria për të marrë vendime mbi jetën, bujaria, perceptimi i korrupsionit etj. Tre vendet që qëndrojnë në fund të renditjes janë Togo, Siria dhe Burundi, ndikuar nga lufta dhe pasiguria për jetën.
