Agjenti Bob Mazur u dridh! Vite të tëra pune si agjent i maskuar brenda perandorisë së drogës së Pablo Escobar mund të zhdukeshin për shkak të një incidenti.
Regjistruesi i tij, i vendosur brenda një valixheje luksoze, kishte rënë gjatë një takimi me xhelatin e frikshëm, Rudy Armbrecht.
Nëse trafikanti do e shihte pajisjen, Bob do ishte një i vdekur. Çdo shenjë paniku do ishte fatale.
Teksa truri i ziente, Bob u përkul pak dhe e shtyu tutje regjistruesin.
“E dija se nëse do frikësohesha, këta kriminelë kanë shqisën e gjashtë, ata mund të nuhasin frikën”.
Ishte një nga episodet më të frikshme të pesë viteve të Bob brenda kartelit më të tmerrshëm të drogës në botë.
Bëhet fjalë për kartelin ‘Medelin’ të kolumbianit Pablo Escobar, që në kulmin e tij kishte një pasuri prej mbi 25 miliardë dollarë.
Ishin pikërisht pastruesit e parave që e bënin të mundur ekzistencën e kësaj perandorie, shkruan mapo.
Misioni i Bob ishte të kapte këta, duke u hequr si Bob Musella, një biznesmen i korruptuar me lidhje me mafian.
Historia e tij e pabesueshme është bërë film nga Hollivudi.
“I infiltruari” ka për aktor kryesor Bryan Cranston, në rolin e Bob.
Aty tregohet edhe incidenti në një hotel në Nju Jork, me Armbrecht, krimineli që drejtonte flotën e avionëve të drogës së Escobar.
Agjenti Bob inskenoi një dasmë, ku do të arrestoheshin të gjithë trafikantët e drogës.
Ai dhe ‘bashkëshortja’, agjentja e maskuar Kathy Ertz, ishin në qendër të operacionit ‘C-chase’- kodi për dasmën.
Gjatë ‘dasmës’ u arrestuan 85 persona të lidhur me kartelin e Medelinit.
Operacioni solli edhe rrëzimin e BCCI, bankës së shtatë private më të madhe në botë dhe dënimin e diktatorit panamez, gjeneral Manuel Noriega.
Arma më e fortë e Bob ishte regjistruesi.
Ai bëri 1200 regjistrime dhe një ekip specialistësh punoi 18 muaj për transkriptimin.
Pasi doli në pension në vitin 1998, Bob gjeti punë në Hollivud duke këshilluar për filmat aksion.
I inkurajuar nga një regjisor, ai shkroi kujtimet e tij.
Identiteti i tij mbetet akoma edhe sot sekret.
Ai mori pjesë në premierën e filmit “I infiltruari” në Florida.
Ishte në audiencë, sërish i paidentifikuar… akoma i maskuar.
