Amnesty International ka publikuar së fundmi një raport në lidhje me sulmet ajrore ruse mbi territorin sirian, ku thuhet se mbi 200 civilë kanë mbetur të vrarë që prej 30 shtatorit e deri më 29 nëntor. Në raport citohen dëshmitarë dhe aktivistë.
Kjo organizatë thotë se që prej nisjes së sulmeve në territorin e Sirisë, Rusia ka shkelur disa herë ligjin humanitar ndërkombëtar. Ndërkohë, në anën tjetër Moska e ka mohuar në mënyrë të përsëritur se ka shkaktuar viktima mes civilëve në Siri, duke i përshkruar pretendime të tilla si pjesë e “luftës së informacionit”.
Më 30 shtator, Rusia nisi sulmet ajrore në territorin e Sirisë me objektivë militantët e ISIS dhe grupet e tjera mbështetëse të Shtetit Islamik, duke thënë se veprimi ishte ndërmarrë pas kërkesës së bërë nga Presidenti sirian, Bashar al-Asad. Gjithashtu, Moska është akuzuar edhe për bombardimin e pozicioneve të rebelëve që luftojnë regjimin e Assad, por të mbështetur nga Perëndimi.
Në raport, “Amnesty International” ka përfshirë sulmet ruse në provincat e Homs, Hama, Idlib, Latakia dhe Aleppo. Ata kanë pyetur 16 dëshmitarë me anë të telefonit ose internetit, mes të cilëve ka mjekë dhe aktivistë të të drejtave të njeriut. Përveç kësaj, grupi ka shqyrtuar edhe imazhet audiovizuale në lidhje me sulmet.
Deri tani ende nuk ka pasur një reagim zyrtar nga ana e Rusisë mbi këtë raport të fundit. /Top Channel
