Një prej trafikantëve më të kërkuar në botë të drogës, kolumbiani Henry de Jesus Lopez, u arrestua ditën e mërkurë në Argjentinë.
I pagëzuar gjerësisht si pasardhësi i famëkeqit Pablo Escobar dhe i njohur gjerësisht me nofkën “Mi Sangre” (gjaku im), Lopez u prangos ndërsa drekonte në një restorant në kryeqytetin Buenos Aires.
“Mi Sangre” është drejtues i kartelit të “Urabenos”, i cili ka nën kontroll pothuajse të gjithë trafikun e kokainës dhe drogave të tjera në veri të Kolumbisë.
Presidenti i Kolumbisë, Juan Manuel Santos, e ka shndërruar luftën ndaj klaneve mafioze si ai i “Urabenos” në një përparësi kombëtare, transmeton TCH.
Nëpërmjet llogarisë së tij në rrjetin shoqëror “Twitter”, Santos falënderoi autoritetet argjentinase për “efikasitetin dhe punën e shkëlqyer” që çoi në arrestimin e të shumëkërkuarve.
“Kjo është një goditje e re e rëndësishme që i japim krimit të organizuar, në luftën për zhdukjen e tij nga Kolumbia”, deklaroi Santos. /Telegrafi/
