‘Duhet të humbet fara e enveristëve që e pinë gjakun e popullit’

“Dje dhe sot një ushtar i ARM-së shumë njerëzve publike, mes tyre edhe mua dhe kolegëve të tjerë në BESË, ua kishte nisur një letër që tashmë është publike dhe të cilën e paskan marrë edhe shumë portale. Meqë nuk e konsideroj atë si korrespodencë private, po i shkruaj dy-tri gjëra këtu:Së pari nuk më bën fare përshtypje që ushtari është anonim, sepse prania e shqiptarëve në ARM është vërtet anonime. As që mund të imagjinohet që ata të udhëheqin me gjeneral-shtabin ose me shërbimin informativ të ARM-së, madje edhe kur e kanë pasur Ministrinë e Mbrojtjes, kjo gati nuk është vërejtur aspak. Së dyti, ajo që e shkruan ky ushtar, është një sintezë e gjendjes sonë të gjithmbarshme, pra jo vetëm e Hasanbegut, Haraçinës e Straçincës. Ai e përshkuan në disa rreshta si duket sot një shqiptar në Maqedoni, e përshkruar faktin se shqiptarët diskriminohen si qenie njerëzore vetëm sepse janë shqiptarë. Dhe, kjo ndodhë në 15 vjetorin e Marrëveshjes së Ohrit. Meqë fuqia jonë si opozitë është mjaft e kufizuar, madje pa pasur asnjë përgjegjësi personale, por thjesht si detyrim moral, unë dua t’i kërkoj falje këtij ushtari, por edhe të gjithë shqiptarëve të tjerë si ai, por edhe shumë shqiptarëve të tjerë në Maqedoni, që e ndjejnë këtë përbuzje dhe nënshtrim dhe këtë e bëj vetëm për një arsye: ju kërkoj falje që kaq vite kishim besuar dhe shpresuar te këta njerëz që na erdhën me lëkurë qengji, duke e fshehur fytyrën e ujkut. Ushtar i nderuar, Unë kam fjalë që ta përshkruaj dhimbjen tënde dhe të shokëve tu.Më mban vetëm një shpresë se pas këtyre zgjedhjeve do të bëhet më mirë. Jo sepse këta do t’i humbin zgjedhjet, por sepse më poshtë seç e kanë ulur shqiptarin këta nuk ka ku shkon më. Andaj, sado që do ta ndryshojmë këtë gjendje, besoj se do të jetë më mirë. Po ta them ty, por edhe të gjithë shqiptarëve të tjerë: për neve nuk është e rëndësishme vetëm a fiton BESA – për neve më e rëndësishme është të humbet fara e enveristëve që pinë gjakun e popullit dhe u shërbejnë armiqve të tij, njësoj sipas shembullit të babait të tyre ideologjik, i cili i vriste shqiptarët, ndërsa i shërbente Miladin Popoviqit e Dushan Mugoshës. Sot këta, duke e vrarë popullin e tyre, qoftë si në Kumanovë e gjetiu, qoftë duke lejuar përmbytjet në fshatrat shqiptare të Shkupit, i shërbejnë me devotshmëri Gruevskit, Miajllkovit dhe të gjithë kriminelëve dhe antishqiptarëve të tjerë. Nëse doni ta keni edhe më të qartë se pse ndodhën përmbytjet në ato fshatra, dilni një ditë nëpër sheshin e Shkupit, shihni ku ka mundësuar BDI-ja të shpenzohet gati një miliard euro dhe pastaj e merrni vesh se pse shqiptarët janë në këtë gjendje dhe pse, mbase, unë kam të drejtë”, – ka shkruar anëtari i kryesisë qendrore në Lëvizjen BESA, Adnan Azizi.