Ndërsa kanë mbetur saktësisht tetë muaj deri në mbajtjen e zgjedhjeve lokale, tashmë kanë nisur ethet e garës së pritshme me sfond politik, fillimisht brenda partive.
Dhe më e forta do jetë padyshim për Prishtinën, aty ku Vetëvendosje bëri historinë duke ia marrë LDK-së. Dhe pikërisht është kjo e fundit që e ka kredo të saj tashmë rimarrjen e kryeqytetin të konsideruar bastion.
Shpend Ahmeti. sipas të gjitha gjasave do jetë sërish kandidat i VV-së për çka e ka besimin e partisë, por i mbetet atij të vendos nëse do garojë, për çka nuk e ka mohuar një gjë të tillë.
Por një situatë krejt tjetër është në kampin e LDK-së ku tashmë kanë nisur të përmenden emra të ndryshëm se kush mund ta rrëzojë Shpendin, ku pritet të ketë një garë tejet të fortë brenda partisë për të nxjerrë një kandidat të fortë.
Portali tesheshi. com nga burime të saja brenda LDK-së ka marrë vesh se deri më tani janë të paktën tre kandidatë seriozq për t’u nominuar nga ky subjekt për të parin e kryeqytetit.
Sipas burimeve ata janë: Arban Abrashi, ministër aktual i Punës, Sokol Havolli, këshilltar i kryeministrit Mustafa, dhe Ismet Beqiri, shef aktual i grupit parlamentar të LDK-së, ish kryetar i kryeqytetit.
“Në LDK veç ka nisur një garë e fortë se kush do të jetë kryetar për Prishtinën. Beqiri, Abrashi e Havolli, pritet të bëjnë garë mes vete ku më pas njëri prej tyre pritet të zgjedhet kandidat për kryetar të kryeqytetit. Edhe pse ndonjë prej tyre tani e mohon një gjë të tillë për shkak të mos ketë përplasje në parti, në fund do pranoi secili prej tyre që merr pëlqimin nga shefi i partisë”, thotë burimi.
Megjithatë, burimi shton se Mustafa do ketë kujdes të veçantë se cili prej emrave të lartcekur do e zgjedh.
“Se kush do jetë kandidat për Prishtinën ka kohë që flitet në rrethin e ngushtë të LDK-së. Por, Mustafa ende nuk ka vendos se cilin prej tyre do e zgjedh për ta sfiduar Shpendin, pasi e di se cilado kandidaturë nuk do ja sjellë sigurt fitoren siç ndodhte vite më parë. Këtë sigurisht e ka parasysh duke pasur në mendje disfatën që pësoi vetë nga Shpendi. Mund të them se ish kryetari Ismet Beqiri ka shumë dëshirë të jetë kandidat, por vështirë se do e kandidon partia duke parë se figura politike e tij vitet e fundit është dobësuar tej mase”, thotë më tej burimi.
Megjithatë nuk përjashtohet mundësia që Mustafa të bëj ndonjë befasi, të zgjedh ndonjë emër tjetër për kreun e Prishtinës, ku një prej tyre është e “përkëdhelura” e tij, prishtinasja Vlora Dumoshi, që aktualisht është shefe e kanitetit të kryeministrit.
“Mustafa mund të befasoi edhe me Vlorën por është më pak e pritshme të ndodh një gjë e tillë pasi asnjëherë nga paslufta LDK nuk ka garuar me ndonjë femër dhe duke pasur parasysh kundërkandidatin fitorja e saj bëhet pothuajse e pamundshme”, thotë burimi.
Se Beqiri vështirë se mund të jetë kandidat, në një mënyrë e ka pohuar edhe Arban Abrashi, një prej më të mundshshmëve për ta sfiduar Ahmetin.
Zëdhënësi aktual i qeverisë nuk e ka mohuar mundësinë që të jetë kandidat për Prishtinën, duke thënë se kërkesa e qytetarëve është që të jetë një kandidat i ri.
“Nuk jam natyrë që imponohem, kur të vjen koha për diskutimin e kandidatit për kryetar të Prishtinës, edhe unë do të jem pjesë e diskutimeve”, ka thënë Abrashi, kohë më parë për mediat kosovare, derisa ka thënë se partia ende nuk ka vendos për asnjë kandidat.
Për dallim nga Abrashi që pret të kandidohet, Havolli ka përjashtuar një mundësi të tillë.
“Në fakt unë jam duke e kryer detyrën e Shefit të Kabinetit dhe nuk do të jem kandidat”, ka deklaruar ai, kohë më parë.
Abrashi dhe Havolli, përfaqësojnë gjeneratën e re të LDK-së dhe si të tillë do të ishte kandidat i përshtatshëm për kryetar të kryeqytetit, pasi që mungesa e një kandidati të ri ishte njëra ndër arsyet pse kjo parti dështoi ta rifitonte Prishtinën katër vjet më parë
Zgjedhjet lokale pritet të zhvillohen në muajin tetor të këtij viti ku LDK-ja synon që sërish ta kthej Prishtinën nën qeverisje, pasi e humbi atë më 2013, për herë të parë nga paslufta.
Shpend Ahmeti nga VV, në raundin e dytë mposhti Isa Mustafën, duke bërë që kështu përfundimisht të thyhet ky bastion i LDK-së. /tesheshi.
