“Gëzohem të raportoj që edhe dy shtete u bashkë-nënshkruan kërkesës sonë për anëtarësi, Kuvajti dhe Luksemburgu”, shkroi javën e kaluar zëvendëskryeministri Hashim Thaçi në profilin e tij në “Facebook” pas takimit që kishte zhvilluar në Paris me disa prej ambasadorëve të shteteve anëtare të UNESCO-s, shkruan sot Koha Ditore.
Kosova synon të bëhet pjesë e Organizatës së Kombeve të Bashkuara për Arsim, Shkencë dhe Kulturë. Thaçi, njëherësh ministër i Jashtëm, njoftoi fiks në 15:42 më 18 shtator për rezultatin e takimit në kryeqytetin francez. Në 22:41, Ilmi Rexhepi, ligjërues i arabishtes në degën e Gjilanit të medresesë “Alauddin”, në llogarinë e tij në “Facebook” dhe në faqen që drejton ai, ‘Vërejtje dhe rregulla gramatikore’, u mor me fjalinë e shefit të diplomacisë kosovare. Ishte përmbajtja gjuhësore e strukturore e fjalëve që e nxitën Rexhepin të shkruante në orët e vona.
Dy gabimet e Thaçit në një fjali
“E para, zëvendëskryeministri, ashtu si shkruan ‘gëzohem të raportoj’, tregon se do të gëzohej sikur të raportonte, ndonëse ka dashur të thotë ‘gëzohem që raportoj se….’”, shkruan Rexhepi, duke shpjeguar gabimet gramatikore gjatë thurjes së fjalisë prej Thaçit. Nuk ndalet me kaq.
