Parlamenti i Luksemburgut ka dhënë dritën jeshile për ndryshimet kushtetuese me të cilën do të nënshkruhen edhe konventat e reje me bashkësitë fetare. Konventa është me një rëndësi të veçantë për myslimanët e këtij vendi.
Për të parën herë në historinë e Luksemburgut në këtë marrëveshje merr pjesë edhe Bashkësia myslimane.
Në fakt Organi përfaqësues i myslimanëve – Shoura, me angazhimin e saj afatgjatë dhe me përkushtim, ka arritur që Islami, si fe e dytë sipas numrit të banorëve në Luksemburg, të njihet nga organet e shtetit.
Konventa e miratuar nga parlamenti jep përfitime të mëdha për myslimanët e Luksemburgut, veçanërisht në aspektin financiar.
Në fakt konventa parashikon që nga buxheti i shtetit të ndahen 450 mijë euro për nevojat e xhematit që funksionon në kuadër të Shouras.
Gjithashtu, ligji i ri myslimanëve të Luksemburgut u ofron mundësinë e krijimit të institucionit të vakëfit, i cili mund të funksionojë në bazë të parimit të fondacionit.
Sipas këtij ligji, myslimanët që dëshirojnë të lënë vakëf pronën e tyre të patundshme apo dëshirojnë të dhurojnë para për nevojat e bashkësisë myslimane, do të lirohen nga tatimi në bazë të vlerës së donacionit të tyre.
Në periudhën e mëvonshme pritet edhe emërimi e Myftiut për Luksmeburgun, njofton portali Identitet.lu. /KP/
