Kosova nuk është anëtare e Organizatës Botërore të Shëndetësisë. Shtetet, të cilat janë anëtare të Organizatës së Kombeve të Bashkuara, mund të bëhen edhe shtete anëtare të OBSH-së derisa ato që nuk janë, mund të aplikojnë.
Meqë Kosova nuk është anëtare e OKB-së, institucionet e vendit duhet iniciojnë çështjen e aplikimit, ndërsa më pastaj vendoset nga anëtarët e gjithsej 193 shteteve, nëse do të anëtarësohet ose jo shteti që aplikon.
Por, zyra e OBSH-së në Kosovë është e pranishme që nga viti 1998 dhe ka dhënë një kontribut të veçantë drejt avancimit dhe konsolidimit të sistemit shëndetësor kosovar.
Udhëheqësi i kësaj zyre, Skënder Syla, ka shpjeguar për Radion Evropa e Lirë përfitimet që mund t’i ketë Kosova pas anëtarësimit në Organizatën Botërore të Shëndetësisë.
“Sa i përket përfitimit, Kosova nuk është anëtare e OBSH-së, por e kemi bërë të mundur që përfaqësuesit e Kosovës të marrin pjesë në takimet e nivelit teknik, dhe pasi nuk jemi shtet anëtar, nuk mund të marrim pjesë në takime të larta, siç janë takimet ministrore, Asambleja e Përgjithshme e OBSH-së si dhe komitetet rajonale të OBSH-së, që në këtë rast përfshin rajonin dhe Evropën. Përfitimet pa dyshim që do të ishin të asaj natyre, që do të na mundësonte gërshetimin dhe këmbimin e informative me shtetet që do të takoheshim”, ka shpjeguar Syla.
Time Kadriaj, nga Komisioni për shëndetësi në Kuvendin e Kosovës, i ka thënë Radios Evropa e Lirë se Ministria e Shëndetësisë është dashur që ta iniciojë çështjen e anëtarësimit të Kosovës në Organizatën Botërore të Shëndetësisë. Mirëpo, siç ka thënë ajo, deri më tani, një gjë e tillë nuk ka ndodhur.
“Unë deri tani nuk kam dëgjuar se Ministria e Shëndetësisë ka aplikuar në OBSH. Mendoj se është një dështim i këtij institucioni. Përpos që po dështon në menaxhim të mirëfilltë të institucioneve shëndetësore, për sigurimin e barnave të listës esenciale; po dështon në zbatim të shumë ligjeve, siç është ai i sigurimeve shëndetësore, ky është edhe një dështim i radhës”.
“Ministria e Shëndetësisë, e ka një performancë të keqe, ku po vendosen njerëz që në rend të parë e kanë veten dhe klikat partiake, si dhe tenderomaninë, duke mos u interesuar se çka po ndodh me shëndetësinë”, ka thënë Kadriaj.
Minsitri i Shëndetësisë, Imet Rrahmani, ka thënë se përveç ministrisë që ai drejton, edhe ajo e Punëve të Jashtme si dhe Presidenca, janë duke punuar në këtë drejtim. Siç ka deklaruar minsitri Rrahmani, duhet pritur momentin e duhur që të aplikohet për anëtarësim në këtë organizatë.
“Ne kemi një bashkëpunim shumë të mirë si Ministri e Shëndetësisë me zyrën e OBSH-së në Prishtinë. Gjithmonë kanë qenë promotorë të shumë proceseve pozitive në shëndetësi dhe janë përkrahës të hapave që ne i ndërmarrim për zhvillimin e shëndetësisë. Anëtarësimi i Kosovës në OBSH do të krijojë shumë mundësi të reja edhe për Ministrinë e Shëndetësisë, por edhe për shëndetësinë në përgjithësi”, ka thënë Rrahmani.
Tutje, sipas ministrit Rrahmani, institucionet duhet të marrin iniciativë që të aplikojnë, por, sipas tij, duhet marrë parasysh edhe faktin që nëse nuk sigurohen votat e mjaftueshme, anëtarësimi mund të refuzohet.
“Në vitin e kaluar i jemi drejtuar Ministrisë së Punëve të jashtme dhe Presidencës që të na sugjerojmë se çfarë janë raportet në çështjen e arritjes së përkrahjes së numrave sa i përket votave. Përgjigjja ka qenë që janë duke punuar në këtë drejtim”, ka deklaruar Rrahmani.
Pavarësisht faktit se nuk është ende anëtare e Organizatës Botërore të Shëndetësisë, Kosovës i është dhënë mundësia të marrë pjesë në të gjitha konferencat ndërkombëtare dhe rajonale të kësaj organizate.
