Kryengritësit ekzekutojnë policët e Assadit

0
181

Pamje shqetësuese nga lufta civile në Aleppo të Sirisë janë futur të mërkurën në rrjetin YouTube. Kryengritësit sirianë shihen duke pushkatuar katër persona, luajalë të presidentit Bashar al-Assad.
Në video shihen kryengritësit duke dërguar katër pjesëtarë të policisë në oborrin e mbushur përplot njerëz, përpara se të dëgjohen rafalet e armëve dhe brohoritjet “Zoti është i madh”.

Pas “shfryrjes” së mllefit me armë, në innçizim mund të shihen pjestarët e policisë të shtrirë për betoni një mbi tjetrin.

Reuters shkruan se ekzekutimi është kryer në oborin e një shkolle në qytetin e dytë sirian për nga madhësia, Allepo, ku prej disa ditësh po zhvillohen luftime të mëdha midis forcave të opozitës dhe trupave siriane të regjimit që refuzon ta dorëzojë pushtetin.

Ekzekutimi i policëve është bërë në kohën kur forcat ajrore të komanduara nga presidenti po bombardojnë pjesë të Aleppos në përpjekje për të shpërndarë kryengritësit që kërkojnë fundin e regjimit që Assad e trashëgoi në vitin 2000 nga i ati, Hafez, i cili e kishte udhëhequr Sirinë për 29 vjet.

Reuters shkruan se të ekzekutuarit ishin pjestarë të policisë besnike të Assadit, të quajtur Shabiha, që prej 17 muajsh janë veçuar në mbrojtjen e regjimit aktual nga kryengritësit e drejtuar nga opozita.

Prej dy javësh Assad nuk ka folur në publik. Ne deklaratën e tij të së mërkurës thuhej se beteja në Aleppo është shumë e rëndësishme për fatin e Sirisë. “Fati i popullit dhe i kombit tonë, e shkuara, e tashmja dhe e ardhmja, varet nga kjo betejë”, tha Assad duke vlerësuar ushtarët që po përballen me kryengritësit të cilët ai i quan “banda terroriste”.

Sipas organizatave për të drejtat e njeriut, gati 20 mijë sirianë janë vrarë prej marsit të vitit të kaluar, kur shpërthyen demonstratat që Assadi fillojë t’i shtypte me dhunë. Shumica e të vrarëve janë civilë, ndërkohë që dhjetëra mijëra janë larguar nga vendi, në drejtim të vendeve fqinje.

Disa nga vendet përendimore në krye me Shtetet e Bashkuara të Amerikës kanë bërë disa herë përpjekje që përmes Këshillit të Sigurimit të OKB-së të krijojnë mundësi për të ndërhyrë në Siri, por Rusia dhe Kina, mbështetëse të regjimit të Assadit, vazhdimisht kanë paralajmëruar vendosjen e vetos. /Telegrafi/.kohaislame