E vërteta e hidhur është se disa burra kthehen në shtëpi me ndonjë shenjë buzëkuqi dhe me aromën e parfumit të ndonjë gruaje tjetër. Ndodh që shenjat të mos jenë gjithnjë kaq të dukshme, por nëse jeni në gjendje t’i shihni me kujdes, ato janë gjithnjë aty.
Ja 11 këshillat që Danin Manet, një investigator privat u jep atyre që mendojnë se partneri po i tradhton.
1. Ndryshime të papritura në pamjen e tij/saj. “Nëse bashkëshorti/bashkëshortja juaj po përpiqet të transformohet në një tjetër burrë/grua tjetër, kjo mund të jetë më shumë se një krizë e moshës së mesme”, paralajmëron Manet.
Ai vazhdon duke thënë se ndryshimet drastike dhe të pashpjegueshme, që një burrë/grua i bën pamjes së tij/saj, stilit të veshjes dhe formave të trupit, janë gjithnjë shenja të pagabueshme të një tradhtie. Nëse ai/ajo vishet ndryshe për në punë, mbase është një kolege, personi që po përpiqeni të gjeni. Nga ana tjetër nëse bashkëshorti/bashkëshortja juaj i/e shëndoshë, që deri më parë nuk e kishte problem peshën, ka filluar të shkojë në palestër dhe të kujdeset për format trupore, mund të mos jeni ju personi që po përpiqet tu impresionojë. Ai/ajo mund të jetë duke u përpjekur të duket bukur për një interes të ri dashuror, ose dëshiron të ruajë të njëjtin fizik me një grua më të re. S’mund të përjashtohen rastet, që personi me të cilin po ju tradhton punon në palestër ose ushtrohet atje.
2. Sjellja e tij/saj karshi jush ndryshon shumë. Ndryshimi i humorit të tij/saj mund të jetë më tepër sesa thjesht një periudhë stresi në punë. Meshkujt shpesh bëhen nervozë kur u duhet të jenë në dy vende të ndryshme njëkohësisht. Nëse tjetra po i ushtron presion që të kalojë më shumë kohë me të, atëherë bashkëshorti juaj do të përpiqet të krijojë grindje me ju, në mënyrë që t’ia mbathi sikur është shumë i zemëruar dhe të shkojë tek ajo.
Nëse ai/ajo jo vetëm po nis zënka, por gjithashtu ka filluar t’ju kritikojë për gjëra që më parë nuk e shqetësonin, si për shembull pamja juaj, zakonet e të ngrënit dhe inteligjenca, ka shumë gjasa të mos jetë problemi te kilogramët që keni shtuar, por te fakti që mes jush ka hyrë një femër/mashkull tjetër. Tradhtia krijon shumë probleme dhe tension, për të dy partnerët në çift. Duhet t’i shtojmë kësaj edhe faktin që tradhtia duhet të jetë “e ndershme”, ndaj partnerët fillojnë të fokusohen mbi gjërat që nuk pëlqejnë te ju, për të justifikuar kështu veprimet e tyre.
3. Ai/ajo bëhet gjithnjë e më i/e largët. Distanca emocionale është fakti numër një që tregon për mungesën e besnikërisë, pasi është e vështirë të përcjellim emocione të ngrohta tek dy njerëz njëkohësisht. Krijimi i një intimiteti emocional me një person që nga ana tjetër po e tradhton, është një sfidë që jo çdo burrë/grua mund ta përballojë. Shumica e njerëzve thjesht nuk mund të mbajnë mbi shpatulla peshën e tradhtisë, për këtë arsye krijojnë një largësi. Ky hendek që krijohet mes jush, ka edhe favoret e veta për atë që tradhton, në këtë mënyrë ai rrezikon më pak të zbulohet. Nëse ai nuk flet shumë, ka më tepër gjasa të mos thotë ndonjë gjë inkriminuese. Nëse bashkëshorti/bashkëshortja juaj fillon t’i shmanget qëndrimit vetëm me ju dhe nëse bisedat tuaja bëhen shumë sipërfaqësore, ai mund të jetë duke ju shtyrë larg, pasi po afrohet shumë me dikë tjetër. Për shembull nëse ai ka filluar të mos ju thotë më fjalë të ëmbla apo nuk jua kapë më dorën në publik, atëherë ai mund të jetë duke e kursyer dashurinë për dikë tjetër, në mënyrë që të mos ndihet fajtor përball lidhjes së re.
4. Sjelljet prej fajtori. Kjo sjellje është një shenjë e sigurt se partneri juaj po fsheh diçka. Ai mund t’ju trajtojë me dashuri dhe t’ju kushtojë vëmendje, si për shembull duke ju dhënë dhurata pa asnjë arsye, duke ju komplimentuar vazhdimisht apo edhe duke ju ndihmuar në punët e shtëpisë. Duke vepruar kështu, bashkëshorti/bashkëshortja juaj po përpiqet t’jua shlyejë tradhtinë e tij/saj dhe në këtë rast është ndjenja e fajit motivi që e udhëheq atë. Kur një burrë/grua ndihet fajtor, ai fillon të veprojë në mënyrë të pazakontë. Për të maskuar tradhtinë e tij/saj ose për t’u çliruar disi nga ndjenja e fajit. Nga ana tjetër, disa partnerë mund të zgjedhin ta shmangin partneri kur kanë diçka për të fshehur, ndaj ata nuk mbajnë më kontakt me sy ose nuk fillojnë biseda. Duke qenë se sytë janë një pikë e fortë e atyre që njihen mirë, disa partnerë mendojnë se duke u parë në sy, sekreti i tyre do të zbulohet dhe ata e shmangin këtë.
5. Sjellje të fshehta, të pazakonta dhe të pashpjegueshme. Mos u shqetësoni vetëm për sjellje e tij/saj të fajtorit. Gjithçka që mund cilësohet si sekrete, e pazakontë dhe e pashpjegueshme, mund të sinjalizojë se ai po ju fsheh diçka. Nëse partneri juaj fillon të bëhet misterioz dhe i pakuptueshëm, po ndodh patjetër ndonjë gjë për të cilën nuk jeni në dijeni. Nëse pamja e kompjuterit lëviz sapo hyni në dhomë, bisedat në telefon ndalojnë, telefonatat pranohen jashtë dhomës ku jeni, gjuha e çuditshme e trupit fillon të flasë dhe nëse partneri fillon të ngurrojë t’ju marrë me vete në vende të ndryshme, dijeni se këto janë sjellje që karakterizojnë një burrë/grua aspak besnik.
6. Nuk e shihni shpesh. Nëse ai papritur nuk është më vërdallë, ka dy mundësi: ose është vërtetë i zënë me punë, ose është i zënë me dikë tjetër. Ndërkohë që bashkëshorti/bashkëshortja juaj mund t’i dalin shumë projekte pune, udhëtime të shpeshta, orare të tejzgjatura pune, arsyeja e kësaj mund të jetë tradhtia e tij/saj. Aktivitetet e mësipërme janë zakonisht mbulimet e fakteve që ai dëshiron të kalojë më shumë kohë me dikë tjetër. Ndoshta mund të ketë planifikuar një fundjavë në ndonjë vend turistik me personin që po ju tradhton. Mund të ndodhë që bashkëshorti/bashkëshortja juaj t’ju shmanget, pasi ndihet fajtor për të qëndruar gjatë me ju në shtëpi.
7. Ai është vazhdimisht i padisponueshëm në telefon. Papritur e keni të vështirë të lidheni me të përzgjedhurin tuaj të jetës? Është celulari i tij/saj i fikur në momente kur më parë ishte gjithnjë i arritshëm? A ankohet bashkëshorti/bashkëshortja juaj se celulari nuk i kishte valë për një periudhë të gjatë kohore? Nëse partneri juaj është shpesh i padisponueshëm, arsyeja e kësaj është se mund të jetë me dikë tjetër. Duke vepruar kështu partnerët mund të kalojnë kohë të konsiderueshme me një tjetër, pa pasur nevojën të kthehen me nxitim në shtëpi. Fikja e celularëve është një mënyrë e mirë për t’u siguruar se asgjë nuk do ta shqetësojë gjatë qëndrimit me personin tjetër.
8. Besojini instinktit. Nëse mendoni se partneri juaj po sillet çuditshëm, po fsheh diçka apo po takohet me dikë tjetër, mos e anashkaloni instinktin tuaj. Intuita është një nga aspektet kryesore, të cilës duhet t’i besojmë. Një grua/burrë e njeh mirë bashkëshortin/bashkëshorten e saj, arrin ta kuptojë kur ai/ajo është i/e lumtur, i/e mërzitur apo edhe i vetmuar. Një person që është me trupin këtu, por me mendjen gjetkë, nuk është i vështirë për t’u identifikuar. Instinkti është ndër të parët që paralajmëron se diçka nuk është në rregull. Në fakt, është ajo ndjesia e ankthit që buron prej kësaj ndjenje të pavetëdijshme, që ndihmon në sinjalizimin e tradhtisë. Kjo e fundit është një veprim i ndërlikuar, ndaj edhe sjellja njerëzore ndryshon gjatë fillimit të një lidhjeje të pandershme. Gjëja më e mirë që një person mund të bëjë, është t’i besojë instinktit të tij dhe ta vërtetojë ose hedhë poshtë atë.
9. Ai/ajo ndryshon në shtrat. Si shtimi ashtu edhe pakësimi i interesit në jetën seksuale sinjalizon për mungesën e besnikërisë. Nëse ai/ajo fillon t’ju shmangë dhe nuk ju sheh më me syrin e tërheqjes, atëherë mund të jetë duke i kënaqur nevojat e tij/saj seksuale diku tjetër. Shumë çifte përjetojnë ndryshime në jetën seksuale me kalimin e kohës, por nëse bashkëshorti/bashkëshortja juaj fillon ta humbasë interesin seksual mbi ju, duhet të merrni parasysh që kjo është një provë e gjallë e tradhtisë së tij/saj. Personi që ka njohur së fundmi mund të jetë duke i dhënë diçka më tepër nga ajo që ai merr në shtëpi. Partneri juaj mund t’i kushtojë më shumë kohë të dashurës/dashurit të tij/saj, pasi i duket misterioze dhe e pazbuluar. Nga ana tjetër, një rritje e jetës seksuale mund të jetë gjithashtu shenjë e tradhtisë. Seksi me një partner të ri, mund të rrisë aktivitetin e hormoneve, duke shtuar kështu dëshirën e bashkëshorti/bashkëshortes tuaj. Një tjetër tregues i tradhtisë, mund të jetë interesi i papritur ndaj një eksperimenti seksual.
10. Një femër e re shfaqet. Nëse bashkëshorti/bashkëshortja juaj fillon t’ju flasë shpesh për një person që ju nuk e keni takuar kurrë, ekziston një mundësi e mirë, që ky person të jetë personi me të cilin po ju tradhton. Nëse do ta pyesni rreth tij, do t’ju përgjigjet se është thjesht një shok/shoqe. Nga ana tjetër, entuziazmi me të cilën po flet për të, tregon të kundërtën. Pavarësisht se ju mund të thoni se është çmenduri që një burrë/grua t’ia prezantojë dashnoren e tij/saj partnerit, ekspertët shprehen se disa persona e bëjnë këtë. Ndonjëherë tradhtarët ndjekin strategji të ndryshme, duke qenë gjysmë të vërtetë, për të shpëtuar nga pesha e rëndë e mundësisë për t’u zbuluar.
11. Ju akuzon për tradhti. “Përse po më bën kaq shumë pyetje?” “Ç’të duhet se ku isha?” “Po shikoja …” “Nëse nuk më beson telefonoi e pyete!” Nëse të gjitha këto mënyra mbrojtjeje ju duken të njohura, atëherë lidhja juaj martesore nuk po shkon dhe aq mirë. Kur një burrë/grua mbrohet shumë gjatë pyetjeve për vendndodhjen e tij/saj apo për oraret e vona të kthimit në shtëpi, atëherë ai mund të jetë duke shmangur diçka shumë të keqe. Po të ishte i/e pastër dhe nëse çdo gjë do të ishte në rregull, atëherë kur ju i bëni pyetje të tilla dyshuese, ai/ajo do të tallej me xhelozinë tuaj. Nga ana tjetër, nëse pa asnjë shkak bashkëshorti/bashkëshortja ju akuzon për tradhti, kjo vjen prej faktit që ai nuk po ju qëndron besnik. Kur një mashkull e sheh sesa e lehtë është të përfshihesh në një marrëdhënie të jashtme, atëherë ai fillon ta shohë edhe partneren e tij/saj në këtë këndvështrim. Nëse ju akuzoheni për tradhti, është një mënyrë e padrejtë për të mbrojtur sjelljen e tij/saj aspak të moralshme.
Në të gjithë botën 3 për qind e fëmijëve janë të lindur nga lidhje jashtëmartesore. 20-33 për qind e tradhtive kryen online. Avokatët e divorceve pranojnë se shifrat e prishjes së martesave janë rritur shumë dhe shkaqet më të dukshme janë tradhtitë në rrjetet sociale.
Shkaqet dhe shpjegimi i tradhtisë nga antropologët.
Studiuesit pohojnë se njeriu është një qenie midis monogamisë dhe poligamisë. Antropologu Bobi Lou shprehet se njeriu anon më shumë nga poligamia. Sipas Helen Fisher ka shkaqe të shumta psikologjike përse ndodh tradhtia. Disa njerëz dëshirojnë t’i shtojnë diçka martesës së tyre, të tjerë kërkojnë të zgjidhin një problem në jetën seksuale. Ka nga ata që duan të tërheqin më shumë vëmendje drejt vetes ose tradhtojnë për t’u hakmarrë, apo për ta bërë martesën e tyre më të gjallë. Një tjetër shpjegim është ai biologjik, sipas të cilit truri i njeriut është i ndërtuar nga dy sisteme, njëri sistem i korrespondon tërheqjes dhe dashurisë romantike, ndërsa tjetri i përket fiksimit ndaj seksit. Helen Fisher shpjegon se ndodh që këto dy sisteme të mos komunikojnë shumë mirë me njëri-tjetrin, ndaj të rriturit fillojnë t’i kënaqin veç e veç me persona të ndryshëm të dyja sferat. Mendohet se meshkujt janë më të ndjeshëm ndaj tradhtisë fizike dhe nuk arrijnë ta falin atë, ndërsa femrat e kanë më shumë problem kur partneri i tyre bie në dashuri me një grua tjetër, pra i tradhton emocionalisht. Tradhtia dhe kulturat. Nga një analizë e 7 kombeve të ndryshme rezultoi se partnerët në një marrëdhënie shërbejnë si i vetmi burim ekskluziv i dhënies së dashurisë dhe kënaqësisë. Në shoqëri të ndryshme, tradhtia perceptohet ndryshe. Për shembull në shoqëritë e mbyllura nëse një mashkull shihet me një femër tjetër, atëherë kjo konsiderohet si tradhti, nga ana tjetër në shoqëritë më të hapura, ky veprim shihet si diçka normale.
Duhet shtuar edhe se në zonat urbane tradhtia është një fenomen më i pranishëm. Sipas një studimi mbi 16.964 persona nga 53 shtete të ndryshme, joshja për lidhje jashtëmartesore ndodh më shpesh në vendet e Lindjes së Mesme sesa në Azinë Lindore si për shembull Kina dhe Japonia.
Llojet e tradhtisë: Tradhtia oportuniste ndodh kur një partner është i dashuruar me partneren e tij/saj, por nuk arrin t’i rezistojë joshjes seksuale ndaj një personi tjetër. Kjo tradhti priret nga dëshirat seksuale dhe varet gjithnjë nga rrethanat e mundësitë.
“Tradhtia obligatore” bazohet në frikën e refuzimit për shkak të dëshirës për një jetë seksuale më të avancuar. Duke qenë se partneri tjetër është kundër këtij/saj ndryshimi në jetën seksuale, personi që tradhton e bën këtë me dëshirën që dikush ta pranojë dhe dëshirojë për atë që është. Ky vazhdon të jetë akoma i tërhequr pas partneres afatgjatë. Tradhtia romantike lind kur ai që tradhton, nuk ndihet më i dashuruar me partneren që ka. Ideja e marrëdhënies dhe kuptimi i përgjithshëm i jetës, është e vetmja gjë që e mban të bashkuar këtë person me partneren që ka.
Tradhtia romantike konfliktuale ndodh kur një person është i dashuruar me dikë, por nga ana tjetër ka dëshira seksuale për njerëz të tjerë. Në këto rrethana, personi në fjalë ndien se nuk mund të thotë asgjë për gjendjen e saj, por nga ana tjetër e ka të pamundur t’i shpëtojë dëshirës për t’u shprehur. Për këtë arsye këto marrëdhënie quhen “lidhje të hapura”.
Tradhtitë përkujtimore janë ato tradhti kur mes një çifti nuk ka më dashuri, por marrëdhënia e tyre vazhdon për hir të gjërave të vjetra që kujtohen si diçka e largët.
