Tre refugjatë janë mbytur ndërsa 23 të tjerë kanë shpëtuar gjatë përpjekjeve për të kaluar lumin “Lumi i Thatë”, informojnë nga organizatat joqeveritare aktive në terren.
“Tre persona janë mbytur në Gjevgjeli ndërkohë që po punohet në zbardhjen e identitetit të tyre. Ekipet janë në terren dhe po kryejnë hetimet”- konfirmuan nga Ministria e Punëve të Brendshme, për të shtuar se gjatë ditës do të shpalosin më shumë detaje. Sipas MPB informatën për tragjedinë e kanë marrë rreth orës 7:00 të mëngjesit të sotëm.
Viktima janë dy burra dhe një grua, ndërsa 23 persona janë nxjerrë nga uji dhe janë dërguar në qendrën transitore Vinojug ku po marrin ndihmën mjekësore.
