VV: Rasim Selmanaj tallet me taksapaguesit e Deçanit

Projektet e shumta të nisura dhe të lëna përgjysmë, projektet të tjera të mbaruara, shkatërruara dhe të rindërtuara nga fillimi dhe para të taksapaguesve të komunës së Deçanit, të hedhura në ajër në emër të projekteve që nuk janë përfunduar kurrë ose nuk kanë nisur kurrë, janë objekti i shqetësimit tonë si lëvizje, e cila përkrah frymën e drejtësisë dhe përkrah zërin dhe shqetësimet e qytetarëve, thuhet në një prononcim për opinion të VV nga Deçani.
Sipas “Vetëvendosjes”, objekt i qartë i abuzimeve dhe keqpërdorimit të parave të taksapaguesve, këtë herë është bërë qendra e qytetit, e cila po rindërtohet pa nevojë. Në këtë projekt, i cili i ka kushtuar taksapaguesve 14 200 € vetëm disa vite më parë, tashmë është shkatërruar, ku ka pasur edhe fontanën në qendër, për t’u rindërtuar një projekt i ri, ndoshta edhe më i shtrenjtë së i pari.
Po ashtu, në fshatin Isniq, me rreth 10 000 banorë, prishet ambulanca e fshatit, e cila ka një staf prej 12 personave të punësuar dhe i shërben fshatit me rrethinë. Ky projekt tashmë i shkatërruar, i cili ishte restauruar pak vite më parë, me rreth 80 000 €, ia ka lënë vendin projektit të ri të shtatores së heroit kombëtar Isa Boletini, me vlerë rreth 100 000 €. Ndërkohë që ambulanca është vendosur në një ambient privat me sipërfaqe rreth 20 m2.
VV-ja thotë se në projekte të tilla nuk është marrë parasysh mendimi i banorëve dhe më saktë ata nuk janë pyetur fare dhe kjo ju ka ardhur si një befasi.
“Situata e tillë kaotike e krijuar, lë të mendosh se drejtuesit komunalë të këtij vendi, janë një grup banditësh të organizuar që paranë e vjelë nga taksapaguesit po e trajtojnë si të ishte pronë e tyre. Ne jemi duke monitoruar dhe duke mbledhur fakte të mjaftueshme, me të cilat do të mund t’i çonim para drejtësisë këta njerëz që e kanë kthyer Deçanin si të ishte ish perëndimi i egër në Amerikën e shekullit 19”, thuhet në fund të reagimit të Lëvizjes Vetëvendosje nga Deçani./Indeksonline/kohaislame

Artikulli paraprakSwisscoy deri në 2014 në Kosovë
Artikulli vijuesRama dhe Meta në Bruksel