Studiuesit turq kanë zhvilluar me sukses një metodë alternative të diagnozës së kancerit që mund të zbulojë qelizat kanceroze te pacientët përmes temperaturës së trupit, rrymave elektrike dhe kamerave infra të kuqe.
Zbulimi i Nevzat Gençer, Cengiz Beşikci dhe Hamza Feza Carlak – të gjithë akademikë në departamentin e inxhinierisë elektrike dhe të elektronikës në Universitetin Teknik të Lindjes së Mesme (ODTÜ) – shihet si një alternativë për metodat standarde të diagnozës siç janë mamografia dhe ultrasonografia.
Teknologjia aktive e imazhit me dy shirita të patentuar në SHBA, duke përdorur rryma me shumë frekuenca, mund të zbulojë indet kanceroze në një fazë të hershme duke shfaqur ndryshimet e temperaturës në trupin e njeriut me kamera infra të kuqe të përdorura zakonisht në industrinë e mbrojtjes, tha Gençer për Agjencinë Anadolu.
“Sidomos për diagnozën e kancerit të gjirit, tiroides dhe të lëkurës, ndryshimi i nxehtësisë i krijuar nga indet kanceroze mund të zbulohet përmes kamerave termike,” tha Gençer.
Ai vuri në dukje se teknologjia “bën një ndryshim” në diagnozën e kancerit, duke shtuar: “Sa më i madh tumori, aq më afër lëkurës, aq më e lartë është performanca e kamerave infra të kuqe”.
Gençer tha se është e vështirë të zbulohen indet kanceroze që janë të thella dhe të vogla në madhësi kur përdoren metoda tradicionale të skanimit termik me një kamera infra të kuqe.
“Ne kemi zhvilluar një teknologji që do ta tejkalojë këtë sfidë në një mënyrë të mirëfilltë”.
Gençer tha se teknologjia e re ishte gati për t’u përdorur nëse mund të sigurohej financimi.
