Apple Inc. është radhitur si shitësi më i mirë i telefonave të mençur në Kinë, duke e mposhtur kështu prodhuesin lokal, Xiaomi, dhe kjo falë rritjes në shitje të iPhone 6.
“Apetiti për produktet e Apple në Kinën urbane është rritur shumë që nga lansimi i iPhone 6 dhe 6 Plus dhe kjo ka vazhduar edhe në Vitin e Ri Kinez”, ka bërë me dije Carolina Milanesi, shefe e hulumtimeve në “Kantar Worldpanel ComTech”.
Firma e hulumtimeve ka thënë se iPhone 6 mbetet si telefoni më i shitur në tregun e dytë më të madh në botë të smartfonëve, ndërsa aksionet e kompanisë janë rritur në 10.2 për qind nga 9.5 për qind, transmeton Koha.net.
“Me dy pajisjet e avancuara, por edhe me modelet e kaluara që po shiten mirë, Apple ia ka dalë të zë vendin e parë në rangimet e prodhuesve të smartfonëve. Xiaomi ka dalë në vendin e dytë”, ka thënë Tamsin Timpson, drejtor strategjik në “Kantar Worldpanel ComTech Asia”.
Në anën tjetër, Samsung po përjeton një rënie në tregun kinez, duke zënë kështu vendin e katërt pas Huaweit, pasi që po përballet me konkurrencë të shtuar nga prodhuesit e pajisjeve me Android me çmime të lira.
Por, megjithatë, gjërat kanë nisur të përmirësohen për kompaninë Jug-Koreane. Pasi humbi ‘pikë’ ndaj Apple-s dhe Xiaomi-t, Samsung duket se është rikthyer në skenë në Kinë me lansimin e pajisjeve të saja të fundit të avancuara, Galaxy S6 dhe S6 Edge në prill, pajisje që përmbajnë specifika të larta.
