Në Kroaci ka pasur reagime të ashpra ndaj qëndrimeve të deputetit gjerman Krichbaum, për raportet Serbi-Kroaci. Politikanët kroatë kritikojnë qëndrimet, ndërsa mediat dyshojnë në trillimin e intervistës.
Intervista e deputetit gjerman Gunther Krichbaum (CDU), që botoi të premten (15.04) Deutsche Welle (fillimisht në gjuhën serbe e pastaj edhe kroate), ka shkaktuar reagime të shumta në këto dy vende.
Deputeti kristiandemokrat, i cili drejton edhe Komisionin e Bundestagut për Çështje Evropiane, e ka kritikuar ashpër Kroacinë për bllokimin e bisedimeve për anëtarësimin e Serbisë në BE.
“Këto dy vende duhet t’i zgjidhin problemet me njeri-tjetrin dhe jo të keqpërdorin Bashkimin Evropian për çëshjtet e pazgjidhura mes tyre”, tha ai në intervistë me DW.
„Ky nuk është qëndrim i Gjermanisë dhe i BE-së, por qëndrim i një politikani gjerman dhe kam frikë se në mediat tona i është dhënë një rëndësi mjaft e madhe”, thotë Zhelko Rajner, kryetar i Saborit kroat. Sipas tij, ky është qëndrimi i një politikani të vetëm, ndaj “Kroacia nuk do të heqë dorë nga qëndrimet e saj“.
Rajner thekson, se ai mban mend edhe qëndrimet e “zotëriut për anëtarësimin e Kroacisë në BE”, por pa i shpjeguar këto qëndrime.
Krichbaum e ka kritikuar disa herë Kroacinë, për shkak të të ashtuquajturit „lex Perkoviq“, një ligji sipas së cilit Zagrebi përpiqet t’i mbrojë shtetasit kroatë nga dorëzimi në vendet ku akuzohen për vepra të ndryshme penale. Në fund, Josip Perkoviq, ish-agjent i UDB, megjithatë është dorëzuar në Gjermani, ku akuzohet për vrasjen e emigrnatit kroat Stjepana Gjurekoviq në vitin 1983, në afërsi të Mynihut.
Lidhur me këtë ligj, Krichbaum i ka shkruar letër edhe Komisionit Evropian dhe ky presion në fund rezultoi me sukses.
Kovaç i ftuar në Bundestag
Qëllimi i Zhelko Rajnerit, një politikani të rëndësishëm në koalcionin qeveritar, që këto t’i quajë si “qëndrime personale të një politikani gjerman”, në këtë rast nuk janë të vërteta. DW mëson nga burime në Bundestag, se përfaqësuesit e të katër grupeve parlamentare kanë qenë “shumë të nervozuar” me bllokadën e bisedimeve të Serbisë nga Zagrebi zyrtar. Burimet tona thonë se qëndrime të tilla kanë demokristianët, socialdemokatët si dhe përfaqësuesit e opozitës – e Majta dhe ekologjistët.
Për seriozitetin e gjendjes flet edhe ftesa dërguar ministrit të Jashtëm kroat Miro Kovaç, për vizitë në Bundestag, jozyrtarisht mëson DW. “Më besoni, është shumë e rrallë që Komisionit për Çështje Evropiane bëjë ftesa të tilla“, thotë burimi i DW. Ftesa është dërguar në Zagreb më 14 prill, por ende nuk ka ndonjë përgjigje zyrtare. Kovaç në kohën sa ka qenë ambasador i Kroacisë në Berlin (2008-2013), është ankuar shpesh për bllokatën e Sllovenisë ndaj Kroacisë. “Asokohe ka pasur mbështetjen tonë, ndërsa tani po sillet njësoj si Sllovenia“, thotë burimi i DW.
Shefi i diplomacisë kroate javën e kaluar nuk ka gjetur kohë për intervistë me DW. Nga kabineti i tij na kanë propozuar “intervistë me shkrim dhe autorizim”, që është nën standardet gazetareske të DW. Por Kovaç ka dhënë disa intervista për mediat kroate, ku thotë se Kroacia kërkon nga Serbia t’i plotësojë kushtet që kanë të bëjnë me familjen evropiane. Ndërsa për përparimin e negociatave të Serbisë me BE vendosin vendet anëtare të BE, pra edhe Kroacia.
Jehona e intervistës
Nëse i kthehemi deklaratës së Rajnerit, se mediat kroate i kanë dhënë dimensione të paqena deklaratave të Krichbaum, ai ka të drejtë. Madje edhe mediat më serioze, të cilat e kanë transmetuar intervistën e DW, i kanë dhënë një jehonë edhe më dramatike intervistës. Tportal i ka transmetuar në mënyrë korrekte pohimet e deputetit, nën titullin: “Anëtari i CDU-së e ka kritikaur ashpër Kroacinë për shkak të bllokadës së Serbisë”. Jutarnji list shkruan “Kërcënim i ashpër nga Berlini – nëse bllokoni Serbinë, do të mbeteni pa para të BE!’“ Ndërkohë që Krichbaum në intervistë nuk përmend askund paratë e BE.
Gazetari i portalit të Jutarnji List, Robert Bajrushi thotë se deklaratat e Krichbaum kanë qenë “interesante për profesionin” dhe se “gazetarët nuk e kanë pyetur deputetin për anën juridike, që është esenca e bllokadës së Kroacisë ndaj Serbisë“. Por ana juridike është trajtuar në dy pyetje. Nuk është keq të dihet që Gjermania praktikon rregullat universale kur bëhet fjalë për krime lufte, krime kundër njerëzimit dhe gjenocid – pavarësisht se kush i ka bërë ato dhe çfarë nënshtetësie kanë viktimat.
Më së largu ka shkuar portali direktno.hr me tekstin: “Intervista e paautorizuar e Gunther Krichbaum ka krijuar tollovi“. Sipas këtij portali, “Menjëherë ka reaguar edhe Dr. Carlsten Buchholz“, shefi zyrës së deputeti Krichbaum. Buchholz, sipas këtij portali, ka deklaruar se “gjatë përkthimit janë bërë paqartësi dhe sipas të gjitha gjasave bëhet fjalë për përkthime jo të sakta të formulimeve”.
Por, përveç faktit që emri i Buchholz është shënuar gabimisht (ai quhet Carsten, e jo Carlsten), askush nga portali Direktno nuk e ka kontaktuar zotin Buchholz me kërkesë për sqarime dhe ai nuk ka bërë asnjë vërejtje sa i përket intervistës apo përkthimit. Kështu ka deklaruar Buchholz për DW.
