Me fajin e saj, Qeveria zhgënjehet në BE-në

Analistët kosovarë, zhgënjimin e Qeverisë së Kosovës me Bashkimin Evropian dhe vlerësimet e larta për Serbinë nga ana e këtij mekanizmi, i shohin si të “paarsyeshme”. Sipas tyre, pala kosovare në dialogun për normalizimin e marrëdhënieve në mes Prishtinës dhe Beogradit, nuk i ka përcaktuar vijat e kuqe, duke ka bërë lëshime në vazhdimësi, gjë e cila e ka suspenduar Kosovën nga vlerësimet pozitive të BE-së.
Ardian Arifaj, nga Instituti KIPRED, theksoi se rruga e Kosovës dhe Serbisë drejt integrimeve evropiane, në këtë rast Kosovës dhe Serbisë, nuk varet nga dialogu për normalizimin e marrëdhënieve në mes Prishtinës dhe Beogradit.

Sipas tij, Serbia, përveç arritjes së marrëveshjeve me Kosovën, ka pasur edhe kushte tjera të vendosura në rrugëtimin e saj drejt BE-së, për të cilat Brukseli ka deklaruar se janë kryer me sukses.

Në rrugëtimin evropian fjala kryesore është përkushtimi, që e kanë shtetet ndaj obligimeve të caktuara nga BE-ja. Kjo, sipas Arifajt, nuk do të thotë domosdoshmërisht edhe zbatim i tyre deri në fund. Kështu, Beogradi zyrtar ka arritur që ta bind Brukselin se është i përkushtuar në zbatimin e marrëveshjeve të arritura në mes Prishtinës dhe Beogradit.

“Nëse Kosova nuk i ka përcaktuar vijat e kuqe para se të dialogojë me Serbinë, atëherë nuk mund të presim që Brukseli do të ndiej dhembshuri të madhe për humbjet që do t’i shkaktoheshin Kosovës. Rezoluta e miratuar në Kuvendin e Kosovës, vitin e kaluar, e cila e ngarkon palën kosovare në dialogun për normalizimin e marrëdhënieve në mes Kosovës dhe Serbisë, thotë qartë se dialogu me Serbinë duhet të bëhet vetëm për çështje teknike dhe assesi për çështje politike”, ka thënë Arifaj për Telegrafin.

Ministri i Jashtëm i Kosovës, Enver Hoxhaj, përmes një postimi në rrjetin social Facebook, duke iu referuar konkluzioneve të Këshillit të BE-së, ka thënë se Kosova nuk është shpërblyer për angazhimin konstruktiv në dialog dhe reformat e ndërmarra.

Analisti Bexhet Shala, thekson për Telegrafin se zhgënjimi nga Bashkimi Evropian është shtirje e Qeverisë së Kosovës, sepse, sipas tij, Qeveria ka qenë pjesëmarrëse në dialogun për normalizimin e marrëdhënieve në mes të Prishtinë dhe Beogradit.

Ai ka theksuar se Qeveria kokë në vete ka marrë vendime për të gjitha proceset të cilat kanë qenë jetike për Kosovën.

“Ekzekutivi i vendit, gjatë dialogut me Republikën e Serbisë, asnjëherë nuk i ka pasur parasysh kritikat dhe sugjerimet e shoqërisë civile, të analistëve dhe të qytetarëve. Ata kanë menduar se bota sillet rreth tyre, duke rënë kështu në gabime të shumta dhe të njëpasnjëshme. Diplomacia serbe, prej një pozicioni humbës, ka arritur që ta konsolidojë pozicionin e shtetit serb përballë BE-së, duke e lënë Kosovën në një pozitë të paqartë dhe me shumë probleme të brendshme, të cilat është shumë vështirë të zgjidhen”, ka thënë Shala. /Telegrafi/

Artikulli paraprakMustafa kundër ndryshimeve kushtetuese për reformën zgjedhore
Artikulli vijuesBullgarët sulmojnë refugjatët e ngratë sirianë