Vetëvendosje kërkon drejtësi për viktimat e 10 shkurtit

Për shkak të dështimit të ndërtimit të shtetit mbi Planin e Ahtisaarit, vlera politike e protestës së 10 shkurtit të vitit 2007 vetëm sa është bërë aktuale, ka thënë sekretari organizativ i lëvizjes “Vetëvendosjes”, Dardan Molliqaj.
“Kjo datë (10 shkurti v.j) është një moment vendimtar në rrafshin politik në Kosovë. Është momenti i kundërshtimit të projektit politik që e ndan Kosovën përbrenda dhe ia mohon popullit të drejtën për vetëvendosje, pra ia mohon qenien politike qytetarit të Kosovës. Demonstrata e 10 shkurtit 2007 është edhe një moment që e thekson çarjen e politikës në dysh, në atë të Planit të Ahtisaarit dhe në atë të konceptit të vetëvendosjes së popullit”, ka thënë të shtunën Molliqaj, shkruan “Koha Ditore”.

“Edhe pas 5 vjetësh të shpalljes së pavarësisë së Kosovës vlera politike e 10 shkurtit vetëm sa është bërë edhe më shumë aktuale, pikërisht për shkak të dështimit të ndërtimit të shtetit përmes të Planit të Ahtisaarit”.

Molliqaj ka treguar se nuk është bërë asgjë në drejtim të nxjerrjes para drejtësisë të pjesëtarëve të kontingjentit rumun të Policisë së UNMIK-ut, nga të cilët kishin mbetur të vdekur në vend dy protestues: Mon Balaj dhe Arben Xheladini. /Telegrafi/

Artikulli paraprakSi të tërhiqen ndërmarrësit nga diaspora?
Artikulli vijuesAksident ujor në Stamboll