Sekretari Amerikan i Shtetit, Johan Kerry gjatë vizitës së tij në Shqipëri falënderoi qeverinë tonë për strehimin e anëtarëve të një grupi opozitar iranian të njohur si muxhahedinë e Khalq ose MEK.
Gjatë dy viteve të kaluara, Shqipëria ka pranuar rreth 1 mijë muxhahedinë e do të strehojë edhe 2 mijë të tjerë. Lajmi është publikuar tek agjencia e lajmeve ‘Zëri i Amerikës’, e cila citon një zyrtar të Departamentit Amerikan të Shtetit. Përpara vizitës të së dielës në Tiranë, zyrtari tha se Kerry nuk do të flasë publikisht për përpjekjet e zhvendosjes së muxhahedinëve në Shqipëri, e cila është një çështje e ndjeshme.
Grupi që pritet të strehohet në Shqipëri, ka mbështetur Shtetet e Bashkuara të Amerikës në operacionet ushtarake në Lindjen e Mesme dhe në luftën e saj kundër terrorizmit. “SHBA do të akordojë një fond prej 20 milionë dollarë për vendosjen e muxhahedinëve në Shqipëri. Ato do të shërbejnë për të ndërtuar objekte ku do të strehohen iranianët”, tha zyrtari i Departamentit Amerikan të Shtetit.
