Beogradi e Prishtina konfirmuan marrëveshjen se të gjitha mallrat pa akcizë, të destinuara për në veri, dhe ato me akcizë deri 3,5 tonë do të kenë hyrje të lirë në territorin e Kosovës. Marrëveshja hyn në fuqi me 20.12.
Ditën pas fillimit të zbatimit të marrëveshjes për menaxhimin e integruar të kufirit, i cili në dy kalime ndërmjet Kosovës dhe Serbisë ka hyrë në fuqi më 10 dhjetor të këtij viti, u vunë re probleme në zbatimin e marrëveshjes. Shtatë ditë më shumë zgjatën bisedimet e grupeve implementuese, në të cilat u arrit mbrëmë (18.12.) në një marrëveshje: “Vendimet, që kemi marrë janë në përputhje me marrëveshjen e kryeministrit Ivica Dacić dhe zotit Thaçi. Eshtë rënë dakord që të gjitha mallrat, që shkojnë në veri të Kosovës, nuk do t’i nënshtrohen asnjë lloj procedure. Kjo do të thotë që të gjitha mallrat pa akcizë, që shkojnë në veri, dhe mallrat me akcizë deri në 3,5 tonë do të kenë hyrje të lirë në territorin e Kosovës, nëse, përsëris, janë planifikuar të shkojnë në veri të vendit“, deklaroi shefi i ekipit negociator të Beogradit në dialogun teknik me Prishtinën, Dejan Pavićević.
Grupet e punës për zbatimin e menaxhimit të integruar të kalimeve kufitare kanë rënë dakord edhe që dokumentet shoqëruese të mallrave të kopjohen “vetëm për mbajtjen e statistikave”: “Ky kopjim i dokumenteve, mund t’i sigurojmë qytetarët tanë, nuk do të ndikojë në asnjë mënyrë mbi ta, dhe as nuk do t’u krijojë ndonjë problem”, shpjegon Pavicevic.
Në rast të morespektimit të marrëveshjes i mundur suspendimi i marrëveshjes
Marrëveshja e fundit e grupeve zbatuese, e cila është në përputhje me marrëveshjen e arritur tashmë ndërmjet kryeminsitrave Dacic dhe Thaçi, do të fillojë të zbatohet në kalimet kufitare nën kontrollin e përbashkët nga e enjtja (20.12.) nga ora tetë në mëngjes dhe do të jetë në fuqi, deri sa të fillojnë bisedimet për zgjidhjen e përhershme për ndarjen e të ardhurave doganore. Në të njëjtën kohë Pavićević përsëriti edhe një herë nga Brukseli, siç tha ai, garancinë, që qeveria serbe i ka dhënë qytetarëve të saj.
“Nëse kjo marrëveshje nuk respektohet dhe nëse mallrat me akcizë dhe pa akcizë deri në 3,5 tonë, që janë të destinuara për veriun e Kosovës, nuk hyjnë lirshëm në territorin e Kosovës, marrëveshja për menaxhimin e integruar të linjës administrative do të pezullohet”, paralajmëroi Pavićević.
