Pas tragjedisë në Kolovicë të Prishtinës, Xhelal Sveçla jep dorëheqje

Deri tash drejtori i Inspektoriatit të Komunës së Prishtinës, Xhelal Sveçla, nuk është më pjesë e kabinetit të Shpend Ahmetit.

Ai ka dhënë dorëheqje nga posti i tij, pas vdekjes tragjike të dy fëmijëve të familjes Mramori në lagjen Kolovicë të Prishtinës.

“Është tragjedi e madhe. Është pak të them se ndjej keqardhje. Është tragjedi jo vetëm për familjen”, ka thënë Sveçla në Interaktiv të KTV-së.

Ai, në emër të Komunës së Prishtinës, ka thënë se mban përgjegjësi njerëzore dhe se janë në dispozicion të të gjitha organeve për bashkëpunim për të gjetur fajtorin.

“Prej vitit 2014 së bashku me kolegët kam pasë detyrën që ta udhëheq Drejtorinë e Inspeksionit në Komunën e Prishtinës dhe jam krenar që për gjithë këtë kohë kemi kryer punë të mëdha. Kemi ndaluar të gjitha ndërtimet pa leje dhe kemi vënë rend në shfrytëzimin e hapësirës publike. E kemi ndaluar korrupsionin e instaluar qysh pas luftës nga qeverisjet e kaluara dhe i kemi dërguar dhjetëra inspektorë në prokurori. I kemi rrënuar 119 shtëpi që kanë paraqitur rrezikshmëri për qytetarët. I kemi identifikuar dhe i kemi pastruar 117 deponi ilegale. Kemi konfiskuar mbi 2000 automjete që kanë shkelur ligjet e komunikacionit. Vetëm në vitin 2015 i kemi proceduar afër katërmijë raste. I kemi paranduluar shumë rreziqe, përfshirë edhe mbylljen e disa gropave. Mirëpo, fatkeqësisht ka qenë e pamundur që të eliminohen të gjitha parregullsitë”, ka thënë ai.

Artikulli paraprakAlarmante: Franca pranë luftës civile?!
Artikulli vijuesMyslimanë e katolikë bashkë në iftar me Veselin