Presidenti rus Vladimir Putin, tha se është arritur marrëveshje për armëpushim në Ukrainën lindore, që do të hyjë në fuqi nga e shtuna në mesnatë.
Njoftimi pasoi bisedimet maratonike që zgjatën gjatë gjithë natës në kryeqytetin e Bjellorusisë ndërmjet udhëheqësve të Rusisë, Ukrainës, Francës dhe Gjermanisë.
Nuk janë dhënë hollësi të tjera rreth marrëveshjes për armëpushimin.
Takimi i nivelit të lartë u organizua me ngut javën e kaluar, pasi që kancelarja gjermane Angela Merkel dhe presidenti francez Francois Hollande, i paraqitën një plan të paqes presidentit rus Vladimir Putin në Moskë.
Presidenti francez e kishte përshkruar takimin në Minsk si “një nga mundësitë e fundit” për arritjen e paqes në rajonin e rrënuar të Ukrainës lindore, ku separatistët pro rus po luftojnë tash e dhjetë muaj kundër forcave të Ukrainës. Të paktën 5 mijë e 400 veta janë vrarë gjatë luftimeve dhe mijëra janë plagosur./zeriamerikes
