Të shkruash dhe ta prezantosh një njëri të pasur nuk është e vështirë , pasuria që ka në pronësi , xhirollogaritë bankare të mbushura , shtëpi dhe vetura luksoze , shoqëri pasanikësh e të tjera e të tjera pamje që shumëkënd e bëjnë tu ketë lakmi , mjaftojnë për prezantimin e tij e që rezulton me admirim nga njerëzit .
Ne do tua prezantojmë një qytetar të Kosovës , besimtarë i besimit Islam që jeton dhe vepron në Fushë Kosovë, ky është Shpejtim Haziri . Në shikim të parë tek Shpejtimi 34 vjeçar , baba i gjashtë fëmijëve nuk s vëren asgjë të veçantë , ditën e fillon me faljen e namazit të sabahut në xhaminë II të Fushë Kosovës, pastaj kujdeset për fëmijët që të shkojnë në shkollë të sigurt nga qentë e shumtë endacak në fushat afër shtëpisë dhe trafiku i ngarkuar i mëngjesit afër shkollës fillore në Fushë Kosovë . Duke qenë kryefamiljarë i një familje tetë anëtarësh Shpejtimi si çdo njëri duhet të punoj për të fituar mjete për jetesën e familjes .
Ai gjashtë ditë në javë punon një punë që ashtu sikur Shpejtimi i prezantuar deri tani nuk paraqet asgjë të veçantë sepse është profesion i mijëra njerëz gjithandej Kosovës , është fjala për përgatitjen e ushqimit , zierjen , gatimin .
Atëherë përse duhet të jetë shembull në mesin tonë ?! Pyet kureshtja e lexuesit të këtyre rreshtave . Po, duhet të jetë shembull se si në praktikë dëshmohet humanizmi , altruizmi i një njeriu që porositë Profetike se çfarë duhet të bëjmë për të varfrit i zbaton çdo ditë dhe jo për një jave e muaj, por për vite tashmë . Transmetohet nga Ebu Hurejra RadiaAllahu anhu se Pejgamberi salAllahu alejhi ve selam ka thënë : “ Ai që kujdeset për të shkretët dhe të varfërit është si ai që lufton në rrugë të Allahut .“( Transmetuesi thotë ) Mendoj se ( Pejgamberi salAllahu alejhi ve selam ) tha : “ Si ai që falet pa ndërprerë dhe si ai që agjëron pa ndërprerë .`` ( Muttefekun alejhi )
Pra , Shpejtimi punon gjashtë ditë në javë me orë të tëra duke përgatitur ushqim për familjet e varfra të Fushë Kosovës të komunitetit ashkali , në gjellëtoren që mban emrin e një njeriut të madh, dijetarit të dalluar Abdulkadër Arnauti (1928 – 2004 ) i cili dijen e materializonte duke ndihmuar të varfrit dhe nevojtarët e për këtë është i njohur në mesin e studentëve shqiptarë në Siri dhe gjithë të tjerëve në Damask ku ka jetuar dhe vepruar ( Allahu e mëshiroftë ) , ndërsa me dijen e tij gjithandej në botë .
Shpejtimi në ‘’ Gjellëtoren Humanitare Hoxhë Abdulkadër Arnauti ‘’ punon një punë fisnike në baza vullnetare duke qenë përgjegjës për gjellëtoren , kuzhinier dhe koordinatorë në raport me donatorët që këtë gjellëtore bëhen shkaktarë ta mbajnë funksionale duke dhuruar ushqime të ndryshme të cilat më pastaj përgatiten nga Shpejtimi . Punën në gjellëtore pothuajse tërë kohën e bën i vetëm rrallë herë ndihmohet nga fëmijët e tij apo nga ndokush tjetër . Kur është fjala të donatorët shfrytëzojmë rastin që edhe përmes këtij shkrimi t’iu bëjmë thirrje të gjithë atyre që kanë mundësi që të kontribuojnë për Gjellëtoren humanitare hoxhë Abdulkader Arnauti . Thotë Allahu në Kuran : : “Dhe ushqejnë me bukë për hir të Tij të varfrin , bonjakun dhe të robëruarin .“ (El Insan , ajeti 8)
I njoftuar me Shpejtimin që nga fillimi i këtij projekti ku ai vullnetarisht mori përsipër këtë përgjegjësi , dhe duke e takuar herë pas here sheh tek ai vendosshmërinë që të vazhdoj ta bëjë këtë punë pa u lodhur dhe pa u ankuar kurrë, sikur të ishte duke u paguar me pagën më të lartë në vend punën që bën .
Vërtetë është një shembull që duhet pasur lakmi jo pse është nga ata me të cilët kemi filluar ketë shkrim , por për faktin që është në gjendje të sakrifikoj kohën dhe mundin e tij për tu ndihmuar të tjerëve duke mos mundur të punoj ndonjë punë që do ti sillte të ardhura për vetën dhe familjen e tij .
Edhepse në këtë gjendje pa të ardhura, Shpejtimit është dashtë ti bëhet presion që të pranoj të marre nga ky ushqim për familjen tij , kishte kaluar një kohë e gjatë kur është kuptuar se ai nuk kishte marrë asnjëherë ushqim për vete dhe familjen e tij duke u deklaruar se : ka të tjerë që janë më nevojshëm se ne .
Vërtetë në fund të ditës , as në fund të javës dhe muajit Shpejtimi nuk kthehet në shtëpinë e tij duke qenë i paguar me para për punën e tij , por kthehet shumë i pasur me shpërblimet që ka përgatitur Allahu për robërit e tij bamirës . Thotë Allahu në Kuran :: A mund të jetë shpërblimi i veprës së mirë diç tjetër , pos të së mirës ! (Er Rrahman , ajeti 60 )
Kthehet në shtëpi i kënaqur jo pse ka fituar para dhe do të blej për fëmijët e tij diçka nga ajo qe ia kërkuan kur doli nga shtëpia në mëngjes , por i kënaqur që është shkaktarë që fëmijëve të varfër të cilët kur morën ushqimin u shkëlqyen sytë nga gëzimi dhe nënave që nuk kishin çfarë t’iu ofrojnë në sofër sytë iu lotuan .
Dikujt mund ti duket se ky përshkrim u përket pamjeve në ndonjë vend të varfër në ndonjë kontinent tjetër , por , një numër i madh i familjeve të komunitetit ashkali në Fushë Kosovë jetojnë nga ajo që gjejnë ne kontejnerë mbeturinash dhe jo vetëm hekurishte dhe plastikë , por ,edhe bukën që dikush e ka hedhur e marrin për ta ngrënë.
Për aktivitetet e gjellëtores hoxhë Abdulkadër Arnauti mund të njoftoheni në faqen e gjellëtores në facebook “ Gjellëtorja humanitare hoxhe Abdulkader Arnauti “ , aty mund të shihni se në çfarë kushtesh jetojnë dhe cila është gjendja e këtyre familjeve .
Prishtinë 07.12.2015
B.Gj.
